بلخ ولایتی ده کرونا گه قرشی کورش کمیسیونی تمانیدن صادر بولگن قرارگه کوره، مزارشریف شهری قرنطینه سی اوچنچی باسقیچی نی اوتکزماقده. بو باسقیچده باردی کیلدی اوچون ینگی چیکلولر جاری ایتیلگن و قچان یکونلنیشی هم معلوم ایمس.

بلخ ولایت حاکمی سوزچی سی منیرفرهاد نشانه خبرآژانسی بیلن صحبت ده دیدی باشقه ولایت لردن کیله یاتکان یوک تاشوچی نقلیه واسطه لرنی مزارشریف شهریگه کیلیشی آلدی الینگن و پولیس شهر یشوچی لری باردی کیلدی سیگه تازه چیکلولر جاری ایتکن.فرهاد جنابلریگه کوره بلخ ولایتی مقاملری اوچ کون آلدین مزارشریف یشوچیلریگه ینگی چیکلولرجاری ایتیلیشی دن خبر بیریب فقط آذوق اوقات ساته یاتکان دوکانلر و ساغلیک نی سقلش مرکزلریگه فعالیت قیلیش ده رخصت بیریلشی نی اعلان ایتکندی لر.

 مزارشریف شهری، شمال و شمال شرق ولایت لری مرکزی حساب لندی و هرکونی مینگلب کیشی دارو درمان و سوداگرلیک اوچون بو شهرگه باریب کیله دیلر.

عینی حالده بلخ ولایتی امنیه قوماندان لیگی مزارشریف یشوچیلریگه ضرور بولمگن باردی کیلدی لردن وازکیچیش لرطلب ایتیب اگر بو توصیه لرگه اعتنا قیلمسه لر پولیس تمانیدن مناسبت کورستیلیشی دن آگاهلنتیرگن.

بلخ امنیه قوماندان لیگی سوزچی سی عادلشاه عادل نشانه خبرآژانسی بیلن صحبت ده دیدی:«قرنطینه کونلریده یالغیز بیماری بولگن شخص لرگه شهرگه کیریش گه رخصت بیریله دی و اگر مردم کرونا ویروسی گه قرشی کورش کمیسیونی قرارلریگه اعتنا قیلمسه لرپولیس اولرگه نسبتاٌ قانونی مناسبت کورسته دی.» عادل جنابلری، مزارشریف ده قرنطینه نینگ اوچنچی باسقیچی یولگه قویلگنی نی ایتیب و قچان یکونلنیشی معلوم ایمس دیدی.

اینگ سونگی معلومات لرگه کوره بلخ ولایتی ده کرونا ویروسی نی یوقتیرگن ۲۱ واقعه رویخط ده الینگن و حاضرچه کووید۱۹ شفاخانه سیده ۱۱ بیمار یاتقیزیلگن. بو ولایت ده کرونا ویروسی نی یوقتیرگن ۵ کیشی هم وفات ایتکن.