هرات عامه ساغليك اداره سيگه كوره بو ولايت ده كرونا ويروسي يوقتيريش گه شبهه لي بولگن اون بيش كيشي نينگ وفاتي بيلن، بو ويروس قربان لري ساني تشويشلنرليچه آرتكن.

عامه ساغليك اداره سي سوزچيسي محمد رفيق شيرزي بوكون ( دوشنبه ١٩ حوت) نشانه خبر آژانسي بيلن صحبت ده ديدي اوتكن ٢٤ ساعت ده هرات يشوچي لريدن اون بيش شبهه لي كيشي عالم دن اوتكن. شيرزي جنابلري ديدي هرچند بو شخصلر نتيجه سي حاضرگه قدر معلوم ايمس اما كرونا ويروسي نشانه لري اولرگه كورينگن. اونگه كوره بو شخص لر يكوني نتيجه سي تيزليكده اعلان بوله دي.

هرات عامه ساغليك اداره سي سوزچيسي عالم دن اوتكن بو شخصلردن ١١ كيشي كوويد١٩ شفاخانه سيده و تورت كيشي سي هم اوي لريده قرنطينه بوليب دوالنماقده ايديلر ديدي.

بو قربانلردن بيري هرات پوليسي مشهور سيمالريدن بيري عبدالروف احمدي ديركه سونگي ييل لرده مردمي پوليس اداره سي باشليغي ايدي. او ويي ده قرنطينه بولگندي اما اوتكن شام ( يكشنبه ١٨جوزا) احوالي آغيرلشكندن سونگ شيدايي شفاخانه سيده انتقال بيريش چاغيده يولده وفات ايتكن.

هرات ده كرونا ويروسي سبب عالم دن اوتكن لر ساني كوپيشي بيلن بوكونلر اجتماعي ترماقلر وفات ايتكن شخصلر اعلاميه لريدن توله دير. حاضر بو وضعيت دوام ايتيب باريشي هرات يشوچيلري ارا جدي تشويشلر توغديرگن. هرات مدني فعاللريدن بيري حبيب الله فرهنگ ديدي اگر كرونا ويروسي سبب عالم دن اوتكن لر شو سرعت بيلن دوام ايتسه هرات اوز جمعيتي دن بير قسميني قول دن بيريشي ممكن. فرهنگ جنابلري تاكيدليدي كرونا ويروسي الديني آليش ده حكومت كوچسيزليگي و مردم نينگ بي پرواليگي هرات يشوچيلريدن كتته قرباني آليشي ممكن دير. او مردم تمانيدن اجتماعي مسافه رعايه ايتيليشي و دولت مسوللري تمانيدن ايجابي ريجه لر عملي بوليش ضرور دير ديدي.

هرات ده اوتكن ٢٤ ساعت دواميده كرونا ويروسي سبب عالم دن اوتكن لر ساني تصديق لنسه بو ويروس سبب اوزجانلريني قولدن بيرگنلر ساني ٨١ كيشي گه يتكن. هرات ده كرونا ويروسي ني يوقتيرگنلر ساني كوپيب بارگني گه قرگنده بو ويروس ني يوقتيرگن كيشيلرني دوالش ده ساغليك ني سقلش اداره لر ناتوان ليگي هم يقال سيزيلماقده. شوحاضر ٣ مينگ و ٨٦٦ كيشي هرات يشوچيلري بو ويروسني يوقتيرگن.اما هرات عامه ساغليك اداره سي فقط ٦٠٠ بيمارني دوالش اوچون مناسب امكانيتلرگه ايگه دير. شو سبب دن كرونا ويروسي ني يوقتيرگن اكثر بيمارلر اوزلريني اويلريده دوالنتيريش ني افضل كورماقده لر.