ايچكي ايشلر وزيرليگي و كندز محلي رسميلري، قلعه زال تومني پوليس باشليغي كرونا ويروسي ني يوقتيرگني سبب اوزجاني ني قولدن بيرگني ني تصديق لشكن.

كندز ولايت حاكمي سوزچيسي عصمت الله مرادي نشانه خبر آژانسي بيلن صحبت ده ديدي عبدالرشيد بشير بير قنچه مدت دن بيري كرونا ويروسي ني يوقتيرگندي و دوالنيش اوچون كابل گه انتقال بيريلگندي. ايچكي ايشلر وزيرليگي هم ،بشيرجنابلري اوتكن كيچه (دوشنبه ١٣ جوزا) ساعت ١١ اطرافيده كابل ده عالم دن اوتكني ني اعلان ايتي.

كندز ولايت حاكمي سوزچيسي علاوه ايتي قلعه زال تومن حاكمي هم بوكون ايرته لب( چهارشنبه ١٤ جوزا ) كرونا ويروسي سبب وفات ايتكن.

باشقه تماندن ايچكي ايشلر وزيرليگي پوليس قوتلري عايله لري بيلن همدردليك كورستيب پوليس صفي ده وقايوي چاره تدبيرني دوام ايتيريب قوللب قوتلش دن ايشانچ بيلديرگن.

كندز ولايتي قلعه زال تومن حاكمي و پوليس باشليغي كرونا ويروسي سبب اونداي بيرحالده اوزجان لريني قولدن بيرديلر كه اوتكن هفته غربي رسانه لر افغانستان امنيتي قوتلريدن ٥٠ فايزي كرونا ويروسي ني يوقتيرگني ني ادعا قيلگنديلر، اما امنيتي قوتلر بو ادعاني رد ايتيب امنيتي اداره لر كرونا ويروسي امنيتي قوتلر صفيده ييرليشي آلديني آليش اوچون بو ويروس تاپيليشيدن آلدين وقايوي چاره تدبيرني قول اوستيگه آلگني ني تاكيدلشكن..