ملي مدافعه وزيرليگي اوتكن ٢٤ ساعتده قندهار ولايتي ارغنداب تومنيده ملي اردو مدافعوي عملياتي نتيجه سيده طالبان نينگ اينگ آز ٨١ جنگچي سي اولديريلگني دن خبر بيرگن.

بو وزيرليك بوكون( دوشنبه ١٢ عقرب) بير خبرنامه نشر ايتيب بو جنگچي لر ارغنداب تومني ” تاببن، چارغلبه، ده سبزي ووزوراهي شاه آغا” قشلاقلريده اولديريلگني ني اعلان ايتكن.

خبرنامه گه كوره طالبان نينگ بو جنگچي لري امنيتي قوتلرگه قرشي هجوم اويشتيرگن دن سونگ ملي اردو نينگ يير و هوا آرقلي مدافعوي عملياتلري نتيجه سيده اولديريلگني ني تاكيدلشكن.

خبرنامه ده شونينگ ديك طالبان نينگ ٣٧ جنگچي سي هم بو عمليات ده باره لنگن. ملي مدافعه وزيرليگي خبرنامه سيده اردو قوتلري عملياتيده طالبان نينگ ١٢ قرارگاهي،٣٠ دن آرتيق موترسايكللري و بيرمقدار قورال يراقلري نابود قيلنگني ني ايتكن.

قريب بير هفته دن بيري قندهار ولايتي ارغنداب تومني ده امنيتي قوتلر و طالبان جنگچي لري ارا توقنشولر باشلنگن و بو توقنشولرده طالبان گه آغير تلفات يتكزيلگن. اوتكن كوني هم قندهار ولايتي امنيه قوماندان ليگي ارغنداب تومنيده طالبان نينگ قريب يوز جنگچي سي اولديريلگني دن خبر بيرگندي.