جهان آذوقه تشكلاتي دفتري، جوزجان ولايتي قاچقينلر اداره سي همكارليگي بيلن شبرغان شهريده يشه ياتكان اوروش آواره لريگه ييمليك اشيا ترقتي. بو تشكيلات اواره عايله لر باله لريگه هم مخصوص آذوقه بيرگن.

جوزجان ولايتي قاچقينلر اداره سي مسوللريدن بيري يارمحمد نشانه خبر آژانسي بيلن صحبت ده بو ييمليك اشيالر اون، دال نخود، ياغ و باله لرگه خاص بولگن ( پلمپي) ماده لردن عبارت دير ديدي. يارمحمدجنابلري گه كوره هر عايله گه ياردم بولگن بو ماده لر قريب ٦ مينگ افغاني گه تينگ دير. اونگه كوره بوكون( پنجشنبه ٤ ثور) فارياب، سرپل و آقچه دن اواره بوليب شبرغان شهريده يشه ياتكان ٥٣ عايله گه بو ياردم لر ترقتيلگن و باشقه عايله لرگه هم كيله سي كونلرده ياردم بوله دي.

جوزجان ولايتي قاچقينلر اداره سي معلوماتيگه كوره حاضرچه شبرغان شهريده جوزجان نينگ ناتينچ تومن لري و قوشني ولايت لردن آواره بوليب كيلگن اون مينگ عايله با پناه آلگن. بو عايله لردن اكثريتي اقتصادي جهت دن يمان احوال ه كون كيچيرماقده لر.

بو آواره لردن بيري امان الله اوچ آي آلدين يتي كيشي ليك عايله سي بيلن فارياب ولايتي نينگ بلچراغ تومن دن قاچيب شبرغان شهريده باش پناه آلگن. او ديدي:” طالبان و دولت ارا اوروش لر سبب بيز اوي جاي ميزني ترك ايتيش گه مجبور بولديك و حاضر شبرغان ده خيمه لر آستيده كون كيچيره ميز.”

پروانه هم درزاب تومني دن آواره بوليب عايله سي بيلن شبرغان شهريده حيات كيچيرماقده. خانم پروانه نشانه خبر آژانسي گه ديدي:” ايككي ييل آلدين داعش و طالبان اوا توقنشولر باعث تورميش اورتاقم ني قولدن بيرديم و حاضر اوچ قيزيم بيلن بير كرايي اويده يشي ميز.” او رمضان آيي عرفه سي و شبرغان شهريده قرنطينه دوام ايتيب باريشي كون لريده بو ياردم لرني قولگه كيريتكني دن خرسندليك بيلديردي.

مملكت شمالي ولايت لريده دوام ايتيب باره ياتكان توقنشو و ناتينچليك لر سبب مينگلب عايله اوز اوي جايلريني ترك ايتيب شبرغان شهريده باش پناه آلگن لر. بو عايله لردن اكثر شبرغان شهري اطرافيده خيمه لر آستيده و قشاق ليك و كمبغليك بيلن كون كيچيرماقده لر.