هرات صراف لري آدم اوغيرلش كوپيشي گه اعتراض كورسيب ايشتلش باشلشگن
neshananews
30 May 2020هرات صرافلري بو ولايت ده آدم اوغيرلش حاللري كوپيگني گه اعتراض بيلديريب صراف ليك بازاريني ياپديلر.
هرات صرافلر اويشمه سي مسوللري ديدي اوتكن ايككي كون جريانيده ايككي صراف تانيلمگن قوراللي كيشيلر تمانيدن اوغيرلنگن و حاضرگه قدر اولرني تقديري نامعلوم دير.
هرات صراف لر اويشمه سي ريسي بهاالدين رحيمي بوكون( شنبه ١٠ جوزا ) نشانه خبر آژانسي بيلن صحبت ده ديدي هرات صراف لريدن ايككي كيشي احمد سخاوت و محمدرضامهري اوتكن هفته چهارشنبه و پنجشنبه كونلري اويلري يقيني دن اوغيرلنديلر. رحيمي جنابلريگه كوره بوصرافلردن بيري ملي امنيت كيمي ده بولگن قوراللي لر تمانيدن اوغيرلنگن.
هرات پوليسي هم بو ايككي صراف تازه ليك ده اوغيرلنگني ني تصديق لشكن. هرات پوليسي سوزچيسي عبدالاحد وليزاده ديدي بو واقعه ني تيكشيريش اوچون كابل دن بير هيات هرات گه كيلگن و پوليس اختطافچي لرني توتقين آليش اوچون تحقيقات ني باشلگن.
آدم اوغيرلش هرات ده ينگي پديده ايمس، بو ولايت ده بوندن آلدين كوپلب آدم اوغيرلش حاللريگه گواه بولگن. بوندن بير آي آلدين هم هرات ملي امنيت اداره سي بيرصراف ني اوغيرلب عايله سيدن ٧٠ مينگ دالر پول آلگن بير گروه آدم اوغيرلش گروه ني توتقين ده آلينگني دن خبر بيرگندي.
