عامه ساغليك وزيرليگي مسوللريگه كوره كرونا ويروسي يوقتيرگن هرات ولايتي مركزي كسلخانه سي اوچ ملازمي قيته ساغليك لريني حاصل قيلديلر. بيرشفاكار و ايككي نرس دن عبارت بولگن بو ملازملر بكون ايشلريگه حاضر بولديلر.

عامه ساغليك وزيرليگي ساغليك ني سخلش قانونلري تطبيق ايتيشي ني تيكروچي رياستي مسولي خالداحدي بوكون دوشنبه ٢٥ حمل نشانه خبر آژانسي بيلن صحبت ده ديدي هرات مركزي كسلخانه سي نينگ بو اوچ ملازمي ايككي هفته اويلريده قرنطينه ايديلر.

اونگه كوره حاضر اولرنينگ ساغليك وضعيت لري يخشي بولگن و نمونه لر نتيجه سي هم سلبي دير.بو اوچ ملازم بوندن ايككي هفته آلدين كرونا ويروسي ني يوقتيرگنديلر.حاضر بو ملازم لر ايشلريگه حاضر بولگن دن سونگ همكسب لري تمانيدن قزيق كوتيب آلينگنلر.

نشر بولگن رقملرگه اساسا” هرات ولايتي ساغليك ني سقلش ملازملريدن جمله دن شفاكارلر، نرسلر ، اداري و تخنيكي خادم لردن ٤١ كيشي كرونا ويروسي ني يوقتيرگن لر.هرات عامه ساغليك اداره سي حاضرگه قدر هرات ده ٢٨٠ كيشي كرونا ويروسي ني يوقتيرگني دن خبر بيريب بولردن ٩٠ فايزي نينگ ساغليك وضعيتي يخشي راق بولگن ديب ايتكن.