واگه بندری هندوستان و پاکستان چیگره سیده جایلشکن. بو بندر کیله سی ایککی کون دن سونگ افغانستان صادراتی یوزییده رسمی روشده آچیلماقچی.

افغانستان نینگ اسلام آبادده‌گی ایلچی سی عاطف مشعل بوکون ( دوشنبه ۲۳ سرطان ) توییترصحیفه سیده یازگن :« افغانستان صادراتی جولای آی ۱۵ سیدن پاکستان نینگ واگه بندری ارقلی کرونا ویروسی ییرلیشی آلدینی آلیش میکانیزم لریگه مطابق قیته باشلنه دی.» پاکستان تشقی ایشلروزیرلیگی هم بو بندر جاری هفته چهارشنبه کونی ( ۲۵ سرطان ) افغانستان حکومتی مخصوص طلبی گه موافق و کرونا ویروسی ییرلیشی آلدینی آلیش اوچون امضالنگن کیلیشونامه گه اساسا آچیله دی دیب خبربیرگن.

 پاکستان تشقی ایشلروزیرلیگی نشرایتکن خبرنامه سیده:« پاکستان افغانستان بیلن ایککی تمان له مه تجارت و ترانزیت بویچه برچه بندرلرینی کرونا ویروسی تاپیلیشی دن آلدینگی وضعیت ده قیترگن دیب یازگن.»

پاکستان حکومتی جاری شمسی ییلی حمل آیی باشیده افغانستان ده کروناویروسی تاپیلگنی دن سونگ افغانستان بیلن برچه بندرلرینی یاپدی. اما سونگی کونلرده بو مملکت اوز بندرلرینی افغانستان تجارتی اشیالری یوزیگه آچیش گه قرار آلگن.