بيرلشكن ملت لر تشكيلاتي افغانستان دهگي دفتري يوناما، بو تشكيلات تينچليك آقيمي و افغانستان كيله جك تيزيمي ده عياللر رولي دن حمايت و ارقه داشليك كورستيشي ني اعلان ايتكن.

يوناما بوكون ( سنبه ١٠ عقرب) عياللر، نينچليك و خوفسيزليك بويچه بيرلشكن ملتلر تشكيلاتي خوفسيزليك كينگاشي تمانيدن صادر ايتيلگن “١٣٢٥” قراري صادر ايتيليشي ايگرمه ييل ليگي مناسبتي بيلن، بو تشكيلات افغانستان تينچليك آقيمي و كيله سي سياسي تيزيمي ده افغانستان عياللر رولي دن حمايت ايتيشي ني اعلان ايتكن.

يوناما بو اعلاميه سيده تينچليك آقيميده عياللر رولي ني قوللب قوتلش افغانستان دايمي و عمومي صلح و تينچليك تامين لنيشي ده ياردم يتكزيشي تاكيدلب شو سبب دن بيرلشكن ملت لر تشكيلاتي عياللرني تينچليك آقيمي و مملكت كيله سي سياسي تيزيميده حمايت ايتيشي ني بيلديرگن.

يوناما بو اعلاميه ده افغانستان يشوچيلري و حكومتي دن عياللر كونده ليك حياتي يخشي لنيشي و حكومتدارليك سيستم لرده عياللر رولي ني قوللب قوتلش ني طلب ايتكن. بو اعلاميه نينگ بير بوليميده افغانستان عياللري و باله لري طالبان و امنيتي قوتلر اوا اوروش نينگ اصلي قربانلري بهالنگن.

يوناما اعلاميه سيده اوتكن ٧ آي جريانيده جنگ لرده اوز جان لريني قولدن بيرگن هر اون عادي اهالي دن تورت كيشي سي عياللر و باله لر بولگني تاكيدلنگن. يوناما افغانستان نينگ اوروش تمان لريدن، زوروانليك لرگه نقطه قويش و عادي اهالي خصوصا عياللر وباله لر قتلي ني توختتيش اوچون مملكت ده عمومي آتش كيسيم اعلان ايتيش لريني طلب ايتكن.

بوندن قريب بير يريم آي آلدين قطرده طالبان و افغانستان دولتي نماينده لري ارا مذاكره لر دوام ايتماقده و ايككي تمان حاضرگه قدر مذاكره لر ايش دستوري لايحه سيني تيارلش ده كيليشه آلمگن لر.افغانستان دولتي تمانيدن بو مذاكره لرده اشتراك ايتكن ٢١ نماينده دن تورت كيشي سي عياللر دير.