هرات ولایتی عامه ساغلیک اداره سی مسوللری بو ولایت مرکزی قماقخانه سیده ۱۳ محبوس کرونا ویاروسی نی یوقتیرگنی دن خبربیرگن.

هرات عامه ساغلیک اداره سی سوزچی سی محمد رفیق شیرزی بوکون( دوشنبه ۲۹ثور) نشانه خبرآژانسی بیلن صحبت ده دیدی:« هرات مرکزی محبسی ده کرونا ویروسی نی یوقتیرگن ۱۳ مثبت واقعه دن علاوه ۸ شبهه لی واقعه هم رویخط ده آلینگن.» شیرزی جنابلری علاوه ایتی کرونا ویروسی نی یوقتیرگن محبوسلر مراقبتی و دوالنیشی واجتماعی مسافه و ساغلیک نی سقلش توصیه لرنی قندای عملی لشتیریش اوچون ایگرمه کیشی لیک بیرگروه هرات عامه ساغلیک اداره سی تمانیدن، محبس ساغلیک نی سقلش خادملریگه تعلیم بیریش مقصدیده وظیفه لنتیریلگن .

  هرات عامه ساغلیک اداره سی سوزچی سی،  بو کسل لیک محبس ده‌گی کیکسه محبوسلرگه یوقیشی ممکن لیگی دن تشویش اظهار ایتیب ، محبس ده سخلنه یاتکان محبوسلرجمعیتی کوپایگی و ساغلیک نی سقلش توصیه لررعایه ایتلمس لیگی سبب، بو محبس نی کروناویروسی نینگ یوقتیریش مرکزیگه ایلنتیریشی ممکن دیدی.

 هرات مرکزی قماخانه سیده حاضرچه ایککی مینگ دن کوپراق محبوس سقلنماقده. بوندن ۸۰ کیشی سی عیاللرمحبوسلر دیر. هرات محبسی بیر مینگ محبوس نی سقلش معیاری گه ایگه دیر. هرچند اوتکن بیر آی جریانیده افغانستان جمهورریسی نینگ نیچه فرمانی گه اساساٌ قریب بیرمینگ محبوس قویب یوباریلدی اما هرات مرکزی قماقخانه سی فضاسی محبوس لر ساغلیک نی تورلی خطربیلن یوز مه یوز قیلیش دن تشویش لر بار.