برلين خلق ارا فيلم فسيتوالي ويب صحيفه سي گه كوره،نسل لر ( Generation) بوليمي ده اينگ يخشي داستان لي فيلم نينگ

” كريستالي خرس” مكافاتي عتيق رحيمي ريجيسورليك قيلگن” نيل دينگيزي عيالي” ناملي فيلم گه تعلق تاپدي.

” نيل دينگيزي عيالي” ناملي فيلم فرانسه، بلجيم و روندا مملكت لري تمانيدن قوشمه شكلده ايشلب چيقاريلگن. افغانستان ليك ريجيسور عتيق رحيمي بو فيلم داستان ني انه شو اسم ده نشر بولگن رمان دن اقتباس آلگن.

نيل دينگيزي عيالي فيلمي روايتي روندا پايتختي “كيگالي” شهريده فعاليت قيلاتگان بير كيچه كندوزلي بلجيمليك كاتوليك مكتب ده تصويرگه توشيريلگن.بو مكتب ده درس اوقي ياتگان قيزلردن اكثري (هوتو)و يالغير ١٠ فايزي ( توتسي) قومي گه منسوب ديرلر.

بو قيزلر فرانسه تيلي ده سوزلشده وظيفه لنتيريلگن و باشقه لردن فرقلي و يوقاري قتلم بوليش ني اورگنيب و تنيقلي عيال لر اوله راق (هوتو) حاكم قومي  نينگ باي و به دولت ايركك لري بيلن تورموش گه چيقيش لري لازم.بو قيزلر نخبه وطنداش و بير يخشي مسيحي بوليش لري شرط. ايركين و اميدلي حيات ني آرزوسيگه بولگن بو قيزلر اما حياتي ني اجتماعي و سياسي كيليشموچليك لرگه چوميلگن شرايط بيلن يولداش بولگن.

افغانستان و ايرانليك مخاطب لر عتيق رحيمي ني عموما “سنگ صبور” فيلمي بيلن تانيديلر،بو فيلم ده ايرانليك مشهور سينماچي گلشيفته فراهاني مركزي رول ني اوينه گن.

عتيق رحيمي نينگ رمانلري افغانستان و ايران ده فارس تيليده اوگيريلگن.

عتيق رحيمي يازگن” لعنت به داستايوسكي” رماني ني افغانستان ليك يازوچي خسرو ماني افغانستان ده و مهدي غبراني ايران ده فرانسه تيلي دن فارس تيلي ده اوگيرگن لر.

برلين خلق ارا فيلم فيستيوالي هر ييل فيبروري آيي ٢٠ سيدن مارچ آيي اولي گه قدر اون كون مدتيده آلمان نينگ برلين شهريده اوتكزيله دي. بو فيستيوال اوتكن آقشام ٧٠ نچي دوريني اوتكزدي.

شونينگ ديك اصلي رقابت بوليميده فيستيوال نينگ آلتين خرس مكافاتي

 ” شيطان موجود ايمس” ناملي ايرانليك ريجيسور محمد رسول اف فيلمي گه تعلق تاپدي.

بيرلين خلق ارا فيلم فيستيوالي اورپا نينگ “كن” و “ونيز” خلق ارا فيستيوال لري كبي اينگ معتبر فيستيوال دير.

ايسلتمه: فيلم حكايه سي نبشت ويب صحيفه سيدن كوچيريلگن.