افغانستان حکومتی بیلن طالبان هیاتلری نینگ تهراندهگی ایکّی کونلیک اوچرهشووی نتیجهلری؛ اوروشنی دوام اېتتیریش اېچیم یول اېمس
طالبان نینگ قطردهگی سیاسي دفتری، بو گروه نمایندهلری نینگ افغانستان حکومت هیاتی بیلن تهرانده ایکّی کونلیک اوچرهشووی قۉشمه بیانات بېریش بیلن یکونلنگنینی معلوم قیلدی.
طالبان نینگ قطردهگی سیاسي دفتری سوزچیسی محمد نعیم بوگون ( پنجشنبه ۱۷ سرطان) تویتتر-ده یازیشیچه، تېز آرهده اوروش نینگ تینچلیک و توزیلیشگه اۉتیش میکانیزمیگه آیدینلیک کیریتیش اوچون اوچرهشوو نینگ ایکّینچی باسقیچی بۉلیب اۉتهدی. طالبان سیاسي دفتری تمانیدن نشر بولگن بو ایکّی کونلیک ییغین نینگ یکوني بیاناتی تأکیدلنگن:
“مملکتده اوروشنی دوام اېتتیریش اېچیم یول اېمس و برچه کوچلر مملکتده اوروشنی توختهتیش اوچون سیاسي اېچیم تاپیشگه سعی و حرکتلرینی قرهتیلیشی کېرهک”.
بیاناتده تهران یغینی مملکتده اوروشنی توختهتیش اوچون سیاسي اېچیمنی کوچهیتیریش اوچون ینگی امکانیت یرهتگنی تأکیدلنگن.
قوشمه بیاناتده، تینچ اهالی یارهلنگن یاکه جماعت آبعېکتلری ویران قیلینگن هجوملرگه هم توختهلیب اۉتیلگن. قۉشمه بیاناتگه کۉره، اوشبو واقعهلر عیبدارلری جوابگرلیککه تارتیلیشی کېرهک. اوشبو آدملرنی قندهی قیلیب جنایي جوابگرلیککه تارتیش حقیده اوشبو بیاناتده ایضاح بیریلمگن.
اېسلهتیب اۉتمیز، اوشبو اوچرهشوو اېران تشقی ایشلر وزیرلیگی میزبانلیگی بیلن کېچه تهرانده باشلنگندی. اوچرهشووده حکومت نامیدن محمد یونیس قانونی، سَلام رحیمی، کریم خرم، ارشاد احمدی و محمدالله بتاش قتنهشدیلر.