امريكا، اوروپا اويشمه سي، نانو تشكيلاتي، فرانسه، آلمان، ايتاليا و ناروي بير قوشمه اعلاميه نشر ايتيب افغانستان ده طالبان دن ريجه لنگن هجوملريني توختتيش و عامه انشاعات و يشش محللرگه قرشي هجوملردن قول تارتيش ني طلب ايتكن.
بو مملكت لر و خلق ارا تشكيلاتلر نماينده لري بوكون (شنبه ١٨ ثور) نشر ايتكن بير قوشمه اعلاميه ده افغانستان ده زوروانليك لر كميشي كه تاكيدلشكنلر. بو اعلاميه ده صلح پروسه سي ايشي آلغه سوريليشي ده جاري زوروانليك لر كولمي كميشي لازم دير. بو مملكتلرني افغانستان اوچون مخصوص نماينده لريني تاكيد لشيشلريچه طالبان بهاري عمليات لريني اعلان ايتمي باشله گني قيد ايتيليب و بو عمليات لر صلح كيليشو عرفه سيده توختتيليشي لازم بولگني ني طلب ايتكنلر،
اعلاميه عيني دمده طالبان دن، اهالي يشه ياتكان محللرده حربي عملياتلريني توختتيشي تي طلب ايتيب و عامه انشاعات لر بوزيليشي دن قول تارتيش لري كيرك دير ديگن. اعلاميه ده شونينگ ديك خبرنگارلر، مدني جماعه فعاللري و محكمه ملازم لريگه قرشي ريجه لنگن هجوملر توختتيليشي هم تاكيدلنگن.
بو مملكت نماينده لري افغانستان جاري صلح مذاكره لري پروسه سيدن حمايت لريني اعلان ايتيب افغانستان تينچليك پروسه سي دن ميزبان ليك قيلگن قطر و تركيه مملكت لريدن قدردانليك بيلديريب افغانستان دولتي و طالبان گروهي دن جاري اوروشني يكونلنتيريش و بير سياسي كيليشو حاصل بوليشي اوچون استانبول يغينيده اشتراك ايتيشلريني ايستشكن. استانبول يغيني اون تورت كون آلدين اوتكزيليشي ريجه لنگندي اما طالبان گروهي اشتراك ايتمسليك باعث ارقه گه توشتي. طالبان نينگ بو يغين ده اشتراك ايتيشي يا ايتمس ليگي هلي هم نامعلوم دير.