امريكا قوشمه ايالتلري تشقي ايشلر وزيري مايك پومپيو قطرده افغانستان دولتي و طالبان گروهي ني مذاكره قيلوچي هياتلري رييس لري و بير قطار اعضالري بيلن اوچرشكن.

تينچليك بويجه دولت وزيرليگي بو حقده بير خبرنامه نشر ايتيب، پومپيو جنابلري اوتكن كوني( شنبه بيرينچي قوس) افغانستان دولتي مذاكره قيلوچي هياتي رييسي و بير قطار اعضالري بيلن قطرده اوچرشيب صحبت قيلگني دن خبر بيرگن.بو وزيرليك خبرنامه سيگه كوره تينچليك بويچه دولت وزيري سعادت منصورنادري، امريكاني افغانستان تينچليك بويچه مخصوص نماينده سي زلمي خليل زاد هم بو اوچرشوده حاضر ايكن.

خبرنامه گه كوره پومپيو جنابلري بو اوچرشوده افغانستان ده دايمي تينچليك و بوقرارليك تامين لنيشي امريكا و افغانستان دولتي ني قوشمه طلبي دير و مذاكره قيلوچي هيات لر بو مملكت ده اوروش ني يكونلتيريش اوچون بير ايچيم يول ني تاپيش ده قادر بوليش لري لازم. پومپيوجنابلري قطر مذاكره لري بير مثبي نتيجه گه ايرشيشي اوچون امريكا حكومتي سعي و حركت قيلماقده ديب تاكيدلشكن.

عيني دمده طالبان نينگ قطرده گي سياسي دفتري امريكا تشقي ايشلر وزيري ني بو دفتر رييسي و مذاكره قيلوچي هياتي ايريم اعضالري بيلن دوحه ده اوچرشكني دن خبر بيرگن. طالبان نينگ قطرده گي سياسي دفتري سوزچيسي محمدنعيم وردك، توييتر صحيفه سيده يازگن تينچليك مذاكره لر، طالبان محبوسلريني قويب يوباريليشي و بو گروه رهبرلري اسملري امريكا و بيرلشكن ملت لر تشكيلاتي قرا رويخطي دن چيقاريليشي طالبان سياسي نماينده لري و امريكا تشقي ايشلر وزيري ارا بوليب صحبت موضوع سي ايكني دن خبر بيرگن.

ايتيليشيچه پومپيو جنابلري بو سفرده افغانلر ارا صلح مذاكره لريني آسانلنتيروچي رول ني اوينه ياتكان قطر اميري بيلن هم اوچرشيب ملاقات قيلگن.

امريكا تشقي ايشلر وزيري ني قطرگه سفري و افغانستان دولتي و طالبان گروهي مذاكره قيلوچي هياتلري بيلن اوچرشوي اونداي بير حالده اوتكزيلدي كه ايريم منبع لر، ايككي تمان صلح مذاكره لري ايش دستوري قراريني صادر ايتيش ده يقين لشكن. بو منبع لر بو ايش دستوري تيزليك ده يكونلنيب امضايتيليشي كوتلماقده ديب خبر بيرگنلر.

افغانستان دولتي و طالبان گروهي مذاكره قيلوچي هياتلري ارا دستلب كي مذاكره لر جاري ييل سنبله آييده قطر ده باشلندي اما ايككي هيات ايككي آي مدتيده صلح مذاكره لري ايش دستوريني صادر قيليش ده كيليشه آلمه ديلر.