امنیتی قوتلر جوزجانده علی‌آباد و کوکلداش پوسته‌لرینی قیته تصرف ایتیلر
neshananews
06 June 2021جوزجان ولایتی محلی رسمیلری امنیتی و مدافعوی قوتلر بلخ – جوزجان شاه‌یولی حدودیده بیر قوشمه حربی عملیات نتيجه سیده امنیتی و مدافعوی قوتلرنی بیر قرارگاهی و بیر پوسته‌سيني طالبان گروهی جنگچیلری‌دن قیته آلیب اوز نظارتلری آستیده کیریتکنی دن خبربیرگنلر. بو قرارگاه و پوسته ایککی کون آلدین طالبان نظارتي‌گه اوتکندی.
جوزجان ولایت حاکمی محمدهاشم رییس نشانه خبرآژانسی بیلن صحبت ده بو حربی عملیات اوتکن کونی ( شنبه ۱۵ جوزا) یولگه قویلگنی دن خبربیریب، بو عملیات آرتیدن علی‌آباد قرارگاهی و کوکلداش پوسته‌سي قیته امنیتی و مدافعوی قوتلر نظارتی‌گه اوتکن دیدی.
امنیتی قوتلرنی بو قرارگاه و پوسته‌سي جوزجان – بلخ شاه‌یولیده و فیض‌آباد تومنی حدودیده جایلشکن.
جوزجان ولایت حاکمی، بو عملیات‌ده طالبان‌نینگ ۱۳ جنگچی‌سي هلاک و ۱۶ جنگچی سي هم یاره‌لنگن ديدي. رییس جنابلری جوزجان ولایتی بیرینچی نمبر شاه‌یولی حدودیده ۱۱ قشلاق طالبان گروهی جنگچیلری‌دن تازه‌لنگنی ني هم تاکیدلشدی.
محمدهاشم رییس جنابلری بو عملیات‌ده مارشال دوستم اوز قوتلری بیلن قتنشکنی‌نی اورته قویب، بلخ – جوزجان شاه یولی حاضرچه دولت حاکمیتی و نظارتي آستیده دیر دیدی. رییس جنابلری علاوه‌ایتدی بو قرارگاه و پوسته طالبان نظارتي آستیده اوتکنی جریانیده امنیتی قوتلردن ایککی کیشی اوزجانی‌ني قولدن بیرگندی. اما طالبان گروهی بو قرارگاه‌ده امنیتی قوتلردن ۱۵ کیشی‌ني اولدیریب و ۲۵ نفرنی هم اسیر آلگنی‌ني ادعا قیلگن. بو حربی عملیات هوا قوتلری حمایتی بیلن یولگه قویلگندی.
ایککی هفته‌دن بیری اردو رهبرلیگی بیلن امنیتی و مدافعوی قوتلر عملیاتی جوزجان – بلخ و جوزجان – آقچه شاه‌یوللری حدودیده دوام ایتماقده. اردو قوتلری طالبان گه قرشی ییر و هوا دن ییریک هجوملر یولگه قویلگنی‌ني تاکیدلشکن. حاضرچه آقچه تومنی ني شبرغان شهری بیلن باغلوچی یگانه یولی یاپیق دیر. آقچه جوزجان ولایتی‌ني کوپ جمعیت‌لي تومنی دیر. طالبان جنگچیلری بو تومن یولیده ایککی هفته آلدین ماین جایلشتیرگن.
