انسان حقلری مستقل کمیسیون: سرطان آی نینگ بیرینچی یرمیده ۲۰۰ گه یقین عادی اهالی اولدیریلگن
neshananews
17 July 2021افغانستان مستقل انسان حقلری کمیسیونسی، فقط‌گینه شو آی نینگ بیرینچی یرمیده مملکتده ۲۰۰ گه یقین تینچ اهالی اۉلدیرگنی‌نی اَیتماقده.
مستقل انسان حقلری کمیسیونسی بوگون (شنبه۲۶ سرطان) مملکتده زۉرآورلیک اوج آلگنیدن کېین کېنگ ترقه‌لگن انسان حقوقلری بوزیلیشی و حربي جنایتلر تۉغریسیده حسابات چیقردی.
حساباتده ایتیلیشیچه، سۉنگگی ایکّی آیده، افغانستان نینگ اکثریت ولایتلری قوراللی تۉقنه‌شوولر کۉپه‌یگنیگه گواه بۉلگن پیتده، مملکت یشوچیلری قیینت احوالده قالیشگن. دستلبکی اشیاگه قولتاپه‌آلمسلیک، حقوقلری و شخص اېرکینلیکلری بۉییچه چېکلاولر مملکتده یقینده صادر بۉلگن زۉرآورلیک نینگ عاقبتلری حسابلنه‌دی.
حساباتگه کۉره، زۉرآورلیک نتیجه‌سیده سرطان آی نینگ بیرینچی یرمیده یالغیز ۲۰۰ گه یقین تینچ اهالی هلاک بۉلگن و کمیده ۱۵۵۶ کیشی جراحت آلگن.
کمیسیون یقینده صادر بۉلگن زۉرآورلیک نینگ عیاللر حیاتیگه تأثیرینی ینه‌ده آغیرراق دېب تعریفله‌دی و طبي خدمتلر و معلوماتلردن فایده‌لنیش جوده چېکلنگنلیگینی تاکیدلشکن.
بو کمیسیون طالبان و افغانستان حکومتینی تینچلیک مذاکره‌لریگه اعتبار قره‌تیشگه و مملکتده تینچ اهالینی حمایه قیلیش اوچون زودلیک بیلن آتش‌کیسیم اعلان قیلیشگه چقیره‌دی.
عینِ پیتده قطرده افغانستان حکومتی و طالبان نینگ یوقاری مرتبه‌لی هیاتلری اۉرته‌سیده تۉغریدن-تۉغری مذاکره‌لر باشلنگن. ایکّی تمان آتش‌کیسیم ، محبوسلرنی آزاد قیلیش و مملکت نینگ کېله‌جکده‌گی سیاسي تیزیمی حقده بحث ینی دوام ایتیرماقده‌لر.
