اوتکن ۲۴ ساعت ده کرونا ویروسی نینگ ۴۹ مثبی واقعه سی رویخط ده آلیندی
عامه ساغلیک وزیرلیگی نی اعلان قیلیشچه اوتکن ۲۴ ساعت دوامیده مملکت ده کرونا ویروسی نی یوقتیرگن ۴۹ واقعه رویخط ده آلینگن.
بو وزیرلیگ بوکون ( چهارشنبه ایککینچی میزان) نشر ایتکن راپوریده مملکت بوویلب ۲۱۳ شبهه لی واقعه دن ۴۹ کیشی کرونا ویروسی نی یوقتیرگن لردیب خبر بیرگن.
معلومات لرگه کوره ۱۷ واقعه هرات ده، ۱۰ واقعه دایکندی ده، ۹ واقعه بلخ ده ، ۶ واقعه کابل ده، ۵ واقعه بدخشان ده و بیرـ بیر واقعه هم پکتیا و میدان وردک ولایت لریده رویخط ده آلینگن.
عینی دمده اوتکن ۲۴ ساعت دوامیده کرونا ویروسی نی یوقتیرگن بیر بیمار هرات ولایتی ده اوز جانی نی قولدن بیرگن.
بو ینگی واقعه لر رویخط ده آلینیشی بیلن مملکت ده حاضرگه قدر ۳۹ مینگ و ۱۴۵ کیشی بو بیمارلیک گه چلینگنی معلوم بولگن.
ایتیلشیچه کرونا ویروسی سونگی هفته لرده مملکت ده آزیب بارماقده.