اوروش روایتی؛ سۉنگگی ایکّی آی ایچیده ۷۵۰ عایله جوزجانده پناه کیلتیرگن
neshananews
30 June 2021مملکت شِمالیده‌گی تومنلرنی اېگه‌للب آلیش اوچون طالبان هجوملری اوج آلگنیدن سۉنگ، جوزجان ولایتی مرکزی شبرغانده طالبلر نظارتی آستیده‌گی حدودلردن ۷۵۰ گه یقین عایله باش‌پناه سورب‌کیلگن. اۉتگن ایکّی آی ایچیده بو عایله‌لر فاریاب، سرپل و جوزجان نینگ ولایتلری نینگ خوفلی تومنلریدن طالبان جنگریلری و خوفسیزلیک کوچلری اۉرته‌سیده بۉلیب اۉتگن آغیر جنگلر طفیلی شبرغان شهریگه آواره بولیب کېلیشگن.
رحیمه یوسفی ایکّی هفته آلدین ینه سکیز عایله بیلن بیرگه سرپل ولایتی نینگ چهارباغ قیشلاغیدن شبرغان شهریگه کوچیب کېلگن. ۴۰ یاشده بولگن رحیمه‌خانم نشانه خبرآژانسی بیلن صحبتده، ایکّی هفته آلدین اولر نینگ قیشلاغیده طالبان جنگچیلری و خوفسیزلیک کوچلری اۉرته‌سیده‌گی آغیر جنگلر طفیلی اۉز اویینی ترک اېتیشگه مجبور بۉلگنلیگینی ایتدی.
یوسفی خانیم نینگ تأکیدلشیچه، اوروش پیتیده اونینگ حویلی‌سیگه کتّه بمب قابیغی توشگن، اما هېچ کیم گه صدمه یتکزمگن. او کېینچه‌لیک قۉشنیلری بیلن قشلاق‌نی ترک اېتیب، شبرغان شهریگه کېلگنینی ایته‌دی. ۴۰ یاشلی عیال نینگ سۉزلریگه کۉره، قیشلاق نینگ اېرککلری اۉز اویلری و اېرلرینی حمایه قیلیش اوچون قیشلاقده قالیشگن. یوسفی خانم، اگر خوفسیزلیک تأمینلنسه، شوکېچه‌‌گه قیشلاققه قَیتیشینی قۉشیمچه قیله‌دی. اونینگ سۉزلریگه کۉره، شبرغان شهریده اولر نینگ یشه‌ش جایی و طعاملنه‌دیگن نرسه‌لری یۉق.
شونینگ‌دیک سکینه هم بیر آی آلدین فاریاب ولایتی نینگ شیرین تگاب تومنیدن آته‌سی، آنه‌سی و ېتیم قالگن تۉرت جیینی بیلن شبرغان‌گه‌کېلگن ینه بیر یاش قیز دیر. سکینه بیر آی آلدین شیرین تگاب تومنیده‌گی جنگلرده ایکّی اکه‌سی و بیر سینگلیسی‌نی قولدن بیرگنی، آنه‌سی جراحت آلگنینی تاکیدلشدی. او اېندی خوفسیز حیات اوچون شبرغان شهریگه کېلگن و اجاره آلگن بیر حویلی‌ده یشه‌یدی. سکینه تیکووچیلیک یاکه کشته‌دۉزلیک کبی اقتصادي امکانیتلرنی تاپیشگه امید قیلماقده. عینِ پیتده او حاضرچه آنه‌سی، آته‌سی و اکه‌سی نینگ تۉرتته ېتیم باله‌سی بیلن شبرغانده حیات کیچیرماقده.
نجیبه، تورموش اورتاقی و تۉرت قیزی بیلن قیرق کون دوامیده شبرغان شهریده باش‌پناه تاپگن ینه بیر عیال نینگ اسمی‌دیر. اونینگ تأکیدلشیچه، اونینگ یگانه اۉغلی طالبلر نظارتی آستیده‌گی حدودیده قالگن. نجیبه خانم سۉنگگی ۴۰ کون ایچیده اۉغلی نینگ تقدیری حقیده بی‌خبر ایکنی‌دن سوز یورتدی. او کسل اېکنلیگینی و حاضرده چادر آستیده یشه‌یاتگنینی ایتدی.
باشقه تاماندن، شیر محمد اوروش سببلی جوزجان ولایتی نینگ منگجیک تومنیدن ولایت مرکزیگه آواره بولیب کیلگن. اونینگ سۉزلریگه کۉره، او اوروشدن قاچگنیده اۉزی بیلن هېچ نرسه آلیب کېله آلمه‌گن. او اوروش خوفیدن قاچیش اوچون اویینی، ایکینزارلری و مال-ملکینی تشلب کېتگنلیگینی تأکیدله‌دی. بو کیکسه آدم اوروش نینگ تېزراق توگه‌شینی و اۉز قیشلاغیگه قَیتیشینی ایسته‌یدی.
عینِ پیتده جوزجان ولایتی قاچقینلر اداره‌سی رسميلری نینگ ایتیشیچه، اوروشده جبر کۉرگن بیر قطار عایله‌لرگه آذوق-طعام و اوی‌اسبابلری یاردم کۉرسه‌تیلگن. اولر نینگ سۉزلریگه کۉره، بویاردملر اوشبو عایله‌لرگه جهان آذوقه تشکیلاتی و داکار موسسه‌سي تمانیدن قاچقینلر اداره‌سی همکارلیکده ترقه‌تیلگن. جوزجان ولایتیده خوفلی منطقه‌لردن آواره بولیب کۉچیب کېلگنلر نینگ رویخط‌ده آلیش ایشلری اوی‌مه‌اوی دوام اېتماقده.
اوّل راق جوزجان ولایتیده‌گی قاچقینلر اداره‌سی بو ولایتده ایچکی آواره‌لر سانی‌نی اۉن مینگدن زیاد عایله‌نی تشکیل اېتگنینی اعلان قیلگندی. اېندی اېسه، بو رقم کۉپه‌یگن. جوزجانده‌گی کۉچیریلگن عایله‌لر نینگ انیق سانی قَیته رویخط‌ده کیریتیلگن‌‌دن سۉنگ انیقلنه‌دی.
