هنوز مكتب ني توگتمي، خبرنگارليك ايشي گه قيزيقيشي سبب بدخشان ولايتي نينگ بير محلي راديو سيگه اوز ايشي ني باشله دي. بيرينچي دن ذوقي برنامه لرني اجرا ايتيب و كينچه ليك راپور تيارلش و سياسي و مدني دستورلرني باشقريش ده يوز كيلتيردي.عالي اوقويورت گه يول تاپكندن سونگ، قيزلر اوچون عالي تعليم معما وقيينتچيليك لري، اولكه ده گي اجتماعي و مدني چيكلو و محروميت لر اوني كتته دغدغه سيگه ايلنيب و بو معمالرني برطرف ايتيش اوچون چاره تدبير تاپيش و بير قطار قيز و عياللرگه ايش زمينه سيني مساعد ايتيش اوچون سعي قيله باشله دي.

اسمي ناجيه سروش، قريب آلتي ييل آلدين عالي اوقويورت نينگ بيرينچي صنف ده درس اوقيش چاغيده ( عياللر آوازي راديو) سي اسميده بير محلي رسانه ني ايجاد ايتيش ده حركت قيلدي و عياللر محروميتي، مظلوميتي و قيينتچيليك لري آوازيني بو راديو آرقلي كوتاردي.

 خانم سروش ديدي بدخشان كبي عنعنوي اولكه ده اهالي آنگي ني اوزگرتيريش ني اوز ايشي سرلوحه سي كيرتيب و راديويي دستورلري آرقلي مردم ني عياللر حق حقوقلري، زوروانليك لرگه نقطه قويش و اولكه ده تبعيض و كم سيتيليش لر آلديني آليش ده آديم باسدي.

اونگه كوره بو ايشلردن علاوه بير قطار ياردمچي ارگانلر و راديو فعاليتي دن حاصل بولگن درآمد دن بيرقطار عياللر و قيزلرگه ايش زمينه سيني مهيا ايتيب و عالي تعليمي مركزلر همكارليگي بيلن تحصيل گه قيريققن شخصلرگه درس زمينه سيني مساعد ايتي.

خانم سروش، شو حاضر ١٥ كيشي بو راديو ده ايشلب كيليشي و بولردن ١٣ نفري قيز و عياللر بولگني ني ايتيب ديدي رسمي ملازملردن علاوه ژورناليزيم فاكولته سي نينگ بيرقطار طلبه لريگه عملي ايش زمينه سيني هم مهيا ايتكن.

خانم سروش بو مدت ده بيرمحلي رسانه ني باشقريش دن علاوه اوز تحصيلاتي ني ماسترليك درجه گه چه يتكزيب و حاضرچه خلق ارا علاقه لر رشته سي ماسترليك درجه سيده سونگي تعليمي ييلي ني اوتكزماقده. او عالي تعليماتي ني هندوستان نينگ ” نويدا انترنيشنل” عالي اوقو يورتيده اوتكزگن.

بو بدخشانليك عيال رسانه اي فعاليت لريني كينگتيريش بيلن عياللرني حاضركي وضعيتي ني اوزگرتيريب كوپلب عياللر و قيزلرگه ايش و درآمد زمينه سيني يرتيب مملكت رواجلنيش يونليشي ده اوز مسوليتي يخشي ليكده بجريشني اميد قيله دي.

بو تشبثكار عيال ني تاكيدلشيچه اگر مني ايش و فعاليت لريم دن ملي و خلق ارا ارگانلر حمايت ايتسه عياللر حياتي ده ينگي دورني ورق اوريب عياللر حياتي ني تهديد قيله ياتكان عنعنوي توشينچه لر گردابي دن اولرني قوتقزه آله من ديدي. چونكه اونگه كوره عياللر علم و بيليم بيلن برچه توسيقلرني اوز يوللري اوستيدن كوتاريش لري ممكن.

هرچند اوتكن ييل لرگه خلاف بدخشان ليك قيز و عياللرني رسانه لرده حضوري كوپيگن اما ايريم مدني عنعنه لر سبب هلي هم بير قطار عياللر و قيزلر بير آز معما و قيينچيليك لرگه دچار ديرلر و اولرگه غلبه قيليش اوچون كورش كيرك.

بدخشان ولايتي عياللر اداره سي ريسي الينا غياثي ديدي بو عيال ني بيلم ساحه سيده فعاليتي بيرتماندن

ثمره لي دير و باشقه تماندن عيال و قيزلرگه ايش زمينه لريني مهيا ايتيشي عايله لر اقتصاديني قوللب قوتلش ده مختوگه سزاوار دير.

بدخشان ولايتي عياللر اداره سي ريسي ” عياللر راديوسي” آوازي بدخشان مركزي و بير قطار تومنلرده يتيب باريشي گه قرگنده مخاطبي كوپ دير و شو باعث عياللر حياتي ده جدي تاثير قالديرگن و شوني اوچون بو اداره، ياردمچي موسسه حمايت لريني جلب ايتيش ده سعي قيلماقده ديب ايتي.

خانم غياثي شو حاضر بدخشانده كوپلب عياللر ايش زمينه لريني يرتيش ده ايلغار ديرلر ديب اما اجتماعي و مدني قيينتچيليك و عنعنه لر هم عياللر برابريده جدي توسيق لر يرتكن كه اولرگه قرشي كورشيش لازم و كيرك دير ديدي.

بدخشانده صميميت، مهربانليك، عفو و جانثارليك، چيدم و مدارا عموما عياللر اسملري بيلن توگيلگن دير، عياللر اساسا” هرقنداي معما و قيينتچيليكلر برابريده صبر قيليب هر قنداي جبر و ظلم برايريده چيدم دن ايش آله ديلر. هرچند بدخشانده عياللر مقابلي ده يقال كورنيب تورگن مدني و عنعنوي شرايط دن تورلي تصوير لر كوزگه كورينه دي اما بو جغرافيا ده بيرقطار عياللر ني تاپيش ممكن كه بو ترتيب سيزليكلر مقابليده عصيان قيليب و اوز مقصدلريگه قول تاپيش اوچون كورش لريني دوام ايتيرماقده لر.