يازوچي: ابو مسلم خراساني

برچه خارجي قوتلر افغانستان ني ترك ايتماقچيلر، طالبان نينگ اوريشي نيچه ولايت ده شدت آليب اوز اوجيگه يتكن. كورينيشي دن برچه خارجي قوتلرني افغانستان دن چيقيشي بيلن طالبان زوروانليك لر كوپيتيريب دولت كوچلريگه قرشي كوپراق هجوملرني ريجه لنتيرماقده لر. اما جمهوريت تيزيميده بير اساسي معما اوله راق دقت گه سزاور موضوع طالبان هجوملريني شدت آليشي ايمس؛ بلكه كابل ده سياسي رهبرلر ارا ملي بيرليك و اجماع يوقليگي دير. كابل ده سياسي پراگنده ليك حاضرچه هرنرسه دن كوره كوپراق اوروش ميدانلريده طالبان ني كوچيلنتريب و امنيتي قوتلر روحيه سيگه سلبي تاثير قالديره ياتكان موضوع انه شو دير.
افغانستان دولتي حاضرچه تورت يوزمينگ دن آشه تعليم كورگن و جهازلنگن حربي قوتلرگه ايگه دير و بو قوتلر آسانليك بيلن طالبان و باشقه تروريستي گروه لر هجوملريني دفع ايته آله ديلر. اساسي سوال بو ديركه كابل ده گي سياسب رهبرلر، طالبان گه قرشي سياسي كيليشموچيليكلرگه قره مي اتفاق لشه آلرميلر و باشقچه قيليب ايتكن ده كابل سياسي اتفاق و اجماع اوچون شرايط مساعدمي يا يوق؟ كورينيشي دن خارجي قوتلرني افغانستان دن چيقيب كيتيشي دن سونگ حاضر طالبان گه قرشي كورش اوچون بيرهرتمان له مه اتفاق و اجماع ايجاد ايتيليشي اوچون قولي شرايط و امكان مساعد بولگن. اگر بونداي اتفاق شكللنمسه وضعيت هم مذاكره ميزيده و هم اوروش ميدانلريده طالبان منفعتي گه بوليشي ممكن.
اوتكن ييل لرده طالبان كابل و افغانستان نينگ كتته شهرلريده هجوملريني كوپيتيريب شدت بيرگن پيت ده مملكت ملي چمپياني احمدشاه مسعود سياسي و جهادي رهبرلر و كمونيستلرني خطابلب ايتكندي : اگر اتفاق بولمسنگيز هلاك بوله سيزلر. بير حساس تاريخي شرايط ده هر قوم، مذهب ، حزب و سياسي انديشه لرنينگ سياسي رهبرلري، احتمال مسعودجنابلري نينگ بو سوزيني اونوتكن بولمسه لر كه اگر بيرلشمسه لر طالبان اولرگه رحم قيلمسه كيرك. حاضركي وضعيت بير اساسي، سياسي و عقلاني مديريت و فداكارليك گه ضرورتي بار. سياسي اجماع و بيرليك اوچون امكان موجود دير و سياسي رهبرلر فداكارليك قيليب و اتفاق بيلن طالبان گه قرشي چيقيشلري لازم.
جمهوررييس غني ” فارن افيرز” محله سي اوچون يازگن سونگي مقاله سيده ايتكن كه مملكت ده تينچليك تامين لنيشي اوچون حاضر دير كه جمهوررييس ليك مدتي يكونلنگندن آلدين قدرت دن چيتلشسه. ايلك بار ديركه غني جنابلري اوتيش يا انتقالي حكومت يوزه گه كيليشي گه موافق ايكني ني بيلديريب و بير سياسي اجماع زمينه سيني يرتيش دن سوز يورتكن. بوندن آلدين جمهورريس غني بير قطار سياسي رهبرلر بيلن ارگ ده اوچرشيب ملاقات قيلدي و بو اورشولر در حقيقت كابل ده بير سياسي اجماع شكللنيشي دن حكايت ايته دي. سياسي اجماع شكللنگن حالده بير تماندن صلح تامين لنيشي امكاني آشه دي و باشقه تماندن صلح پروسه سي ناكام قالگن تقديرده طالبان اوروش آرقلي غلبه قازانه آلميدي و سياسي رهبرلرنينگ كوچلي اتفاقي ني سينديره آلميديلر. بو اره ده سياسي اجماع شكللنيشي اوچون امريكا و منطقه مملكتلري رولي يوكسك و مهم دير. امريكايي لر كابل ده گي برچه سياسي تمانلر بيلن اورنتكن علاقه لريگه قرگنده سياسي رهبرلرني بيرلشتيره آله ديلر و اولرني يگانه فكر بيلن طالبان گه قرشي اوروش گه جونته آله ديلر. اوتكن نيچه كون جريانيده امريكا ني افغانستان تينچليگي اوون مخصوص نماينده سي زلمي خليل زاد و تركيه ني كابل ده گي ايلچي سي صلح اوچون سياسي اجماع شكللنيشي اوچون كوپ سعي قيلديلر.تركيه ايلچي سي برچه سياسي و جهادي رهبرلر بيلن كابل ده اوچرشيب ملاقات قيلدي. بو مملكت بيرتماندن اوزبيكلر و باشقه تماندن تاجيكلر ، پشتونلر و هزاره ار بيلن چوقر علاقه گه ايگه دير و سياسي و جهادي رهبرلرگه ديني و مدني جهت دن ييترليچه نفوذگه ايگه دير.
عيني حالده رمضان هيتي دن سونگ استاندول يغيني اوتكزيلماقچي. بو يغين اوچون سياسي اجماع اوته ضرور دير و افغانستان ده صلح شرايطلريني مهيا ايته آله دي. نيچه ييل دن بويان كه صلح مذاكره لري باشلنگن كابل ده سياسي اجماع شككلنمگني سبب صلح پروسه سي موفقيت گه ايرشمگن. كورينيشي دن خارجي قوتلرني افغانستان دن چيقيشي بيلن سياسي تمان لر حربي و سياسي جهت دن بو خلاصه گه ايريشكنلر كه بير ايچكي اتفاق و اجماع بولمگن تقديرده طالبان گه برشي مقاومت قيليش و كورشيش ناممكن دير. حاضر بو اجماع اوچون برچه ظرفيت و امكانيت لر مساعد بولگن و كيله سي كونلرده اوني يقال نشانه لري آشكار بوليشي حتمي دير.