افغانستان محلي موسيقي سي كوپ مشتاق و سان سيز تينگلوچي لرگه ايگه بولگن صنعت دير. موسقي مشتاقلري هرطبقه دن هم بولسه محلي موسيقي گه قيزيقيشلري مثلسيز دير. بدخشان محلي موسيقي سي نه فقط بو ولايت اوزيده بلكه بدخشان دن تشقريده هم كوبلپ مشتاق و تينگلوچيلرگه ايگه دير و هر طبقه دن مشتاقلرني اوزيگه جلب ايتكن.
بازگل بدخشي اسميده شهرات قازانكن آدينه محمد بدخشان نينگ محلي موسيقي سي ايلغار و جهان مقياسيده شهرت تاپگن اشوله چي دير. او بيران استاد نزديده بو صنعت ني اورگنيش اوچون مراجعه قيلمي، آماتور طرزيده محلي موسيقي قاعده لريني ايزلب و حاضر ” قطغن زمين” سبكي اساسچي سي اوله راق تانيلماقده.
قطغن زمين موسيقي توري افغانستانده اينگ كوپ مشتاق و طرفدارگه ايگه بولگن موسيقي دير.
بازگل بدخشي بدخشان محلي موسيقي سي ني تانيشتيريش ده اساسي و اونيتيب بولمس رول اوينه گن و بيرقطار موسيقي صنعتچي لريگه كوره، بدخشي جنابلري محلي موسيقي مكتبي پايديواريني اساس قويب و حاضر ايسه كوپ موسيقي صنعتچي لريدن اوني يول يوروقي دن ايزداشليك قيليب محلي قوسيق لرني اوقيديلر.
بدخشان محلي موسيقي سي ايلغار اساسچي سي باله ليگ دوريني بدخشان ولايتي كشم تومني تاغلريده چوپان ليك گه اوتكزگن و بو دوره ده محلي قوشيق لرني زمزمه قيليشي و چوپانليك گه خاص بولگن فلك لرگه قيزيقيشي، اوني اياغيني موسيقي عالمي تمان تارتيشكن.
بازگل بدخشي شاهي حكومت گارد قوتلري دايره سيده خذمت قيليشي پيتيده محلي قوسيقلرني گوزل اوقيشي و اجرا ايتيشي بيلن دقت مركزيگه جايلشدي و اوشه زمان ده مملكت نينگ تنيقلي موسيقي استادلري بيلن يقين دن تانيشيب علاقه قوردي. بو علاقه سبب او ايلك بار راديو افغانستان گه يول تاپدي و بو راديو ده نيچه قوشيق ني اوقيب ثبت قيلگني بيلن شهرت چوقه لريگه قول تاپدي.
بو بدخشانليك صنعتچي محلي موسيقي صنعت زمينه سيده عنعنوي طرزه ينگي كامپوزلر يسب و تورلي شعرلر يازيب بدخشان محلي موسيقي سي رواج رونقي اوچون ييريك خذمت قيلدي. اوني قدمي حكايه لري، فلك و عاشقانه قوشيقلري مشتاقلري هلي هم كوپ دير.
” عرب بچه” و “مغول دختر” اوني اينگ مشهور ايجادياتي دير. بونگه علاوه بدخشي جنابلريني عاشقانه قوشيقلري، خصوصا” اي شوخ سر زلف ترا تاب كه داده” و ” خوش امدب يار وفادارم اي” هلي اوزيگه خاص طرفدارلرگه ايگه دير. هرچند سونگي ييللرده بو قوشيقلرني باشقه بير قطار اشوله چي لر هم اجرا ايتكن اما مردم بو قوشيقلر ايجاد كاريني بازگل بدخشي بيله ديلر.
بو محلي اشوله چي نهايت ده اونبير ييل آلدين ١٠٧ ياشليك ده دنيا دن اوتي. بازگل بدخشي مقبره سي بدخشان ولايتي نينگ كشم تومني چنار گنجشكان قشلاقيده جايلشكن.
مملكت صنعتچي و اشوله چيلري بازگل بدخشي ني اينگ مهم خصوصيتي ني محلي موسيقي اصالتي ني سقلش، موسيقي اجرا سيده ساده ليك و ظرافت، اوزيگه خاص تاووشي و دنبوره و غيجك چليش ده خاص مهارتي بولگني ني اورته گه قويب اوني ” قطغن زمين” ساز و آوازي ايجاد كاري بيله ديلر.