سونگي ييللرده بدخشان ولايتيده باغدارليك مدنيتي كوزگه كورنرليچه رواج رونق تاپكن. بو ولايت ده بير قطار ياردمچي موسسه لر همكارليگي و باغدارلرنينگ ٥٠ فايزليك حصه قوشيشي بيلن كوپلب باغلر ايجاد بولگن. اما محصولات اوچون ايشانچلي بازار، ميوه پروسيسي اوچون معياري امكانيت لر يوقليگي و ميوه لرني اوزاق مدت ده سقلش اوچون تخنيكي اسباب اسكونه لر كمچيليگي بدخشان باغدارلري قرشي سيده تورگن اساسي معمادير.هرييلي ميوه موسوميده مينگ لب تن تازه ميوه مملكت بازارلريده يوباريله دي ليكن بو ميوه لرني باشقه موسوملرگه چه سقلش و ذخيره قيليش اوچون امكانيت يوق ليگي باعث اوته پس نرخ ده ساتيله دي. اما ييل نينگ باشقه موسوملريده بازارده چيت دن وارد بوله ياتكان ميوه لر ساتيله دي. بدخشان باغدارلري ديدي اگر بو قتلم دن حمايت بولسه و باغدارلر اوز محصولات لريني معياري روشده ذخيره قيله آلسه لر تورت موسوم ده بازار طلب و احتياج لريني تامين لش امكانيتي كه ايگه ديرلر.

اوسيمليك لر آفتي، مملكت دن چيت ده ميوه صادراتي اوچون زمانوي پروسيس امكانيتي يوق ليگي، زمانوي و معياري باغدارليك سيستمي دن بي خبرليك ، موزخانه لر يوق ليگي باعث ميوه لر افلاس لنيشي اينگ مهم عامللر جمله سيدن دير كه بدخشان باغدارلريني قيينتچليك لرگه دچار قيلگن.

بدخشان باغدارلريگه كوره هرييلي بو باغدارلر مينگلب تن محصولات لريني افلاس لنيشي قورقويدن كوپ پس نرخ گه ساتيشگه محبور ديرلر و يا هم منتظم ترانسپورتي سيستم بولمگني اوچون ميوه لر افلاس لنيشي دن خبر بيره ديلر.

حاضر تازه ميوه موسومي يتيب كيلگن، بدخشان بازارلري هر وقت دن كوره تازه ميوه دن توله دير، اما بو وضعيت نيچه مدت دن سونگ اوزجايي ني خارجي ميوه لرگه بيره دي. بدخشان باغدارلري ديدي بو ولايت جغرافيه سي باغدارليك اوچون مناسب فرصت لرگه ايگه دير و بو موضوع گه نسبتا” اهالي نينگ رغبتي سبب، سونگي ييل لرده كوپلب باغلر ايجاد ايتيشده مردم ني اونده گن.باغدارلرگه كوره اولرنينگ يگانه معماسي محصولات لريني سقلش دير و بو موضوع ني بار بار زراعت اداره سي مسوللريگه ايتكنلر اما بو اداره تمانيدن هيچقنداي حركت بو يولگه قويلمگن.

بهارك تومني باغدارلردن بيري گل علم، موزخانه بولمگني اوچون محصولات لريني كوپ مدت ده سقلي آلمسليگي ني ايتيب هرييلي باغدارليك محصولاتي دن كتته قسمي  افلاس لنيب ضايع بوله دي ديدي.بدخشان نينگ اكثر باغدارلري محصولات لريني عنعنوي طرزده يغيب اوزاق مسافه لردن فيض ابادشهريگه كيلتيريب ساته ديلر.عموما ميوه لر چاروالر آرقلي شهرگه انتقال بيريله دي. اسفالت بولمي قالگن يوللر بو توغريده باغدارلر اوچون كتته معما دير.بدخشان ده باغدارليك بيلن شغللنه ياتكان سونيا خانم محصولات قولگه كيليشي دن آلدين اوسيمليك لرآفتي گه قرشي كورش، محصولات ني معياري طريقه ده سقلش و محصولات ني ترانسپورت بيلن شهرگه انتقال بيريش اوني كوچ و امكانيتي ده اوزاق بولگني ني تاكيدلب بو قيينتچيليك لر سبب بدخشان نينگ اوزاق تومنلري ده گي باغدارلري هرييلي گوپ مقدارده ضررزيان كوره ديلر ديدي.

اونگه كوره اگر دولت و ياردم يتكزوچي ارگانلر محصولات يغيشتيريش وقتي ده اولرگه ياردم يتكزسه لر بدخشان ليك باغدارلر اوز محصولات لريني يخشي نرخ ده ساتيب عايله اري اقتصادي و بازار ضرورت لريني تامين لشده يخشي يوتوق لر حاصل قيله آله ديلر.

باشقه تماندن فيض آبادشهري ميوه ساتوچي دوكاندارلر، ميوه بازاري وضعيتي دن خواتير بيلديريب بو ييل باغدارليك محصولات ميزاني اوتكن ييل گه قرگنده كوزگه كورنرليچه كوپيگني ديديلر، اما ميوه بسته بندليك اوچون منتظم سيستم يوق ليگي ميوه بازاريني بو ولايت ده معماگه دچار قيلگن.فيض آبادشهريده ميوه ساتوچي عبدالمنان، هر كوني  باغدارلردن اون مينگ افغاني گه ميوه ساتيب آليشي ني ايتيب اما آقشام گه چه اوني ساته آلمي من ديدي.

عيني حالده بدخشان زراعت اداره سي مسوللري باغدارلر معمالريني تصديقلب ديدي بو ولايت باغدارلري معمالريني برطرف ايتيش اوچون برق انرژي سي بولمگني باعث مثبي نتيجه بيرمگن ديدي.رسميلري اما دهقان چيليك مديريتي دستوري تطبيق ايتيليشي بيلن بو معما يكون تاپيشي ممكن.

بدخشان ولايتي زراعت اداره سي ريسي معين الدين عيني ديدي زراعت وزيرليگي بودجه سيدن ١٧٤ ميليون و ٦ يوزمينگ مبلغ بيلن ٢٠٥ پروژه ايشي بو ولايت ده باشلنگن و بو پروژه لردن اكثريتي باغدارليك محصولات افلاس ليگي آلديني آليش، دهقانلردن حمايت ايتيش و دهقانچيليك فعاليت لرني ميكانيزه لشتيريش ده بغيشلنگن ديدي. عيني جنابلري بو پروژه لر تطبيق بولگن تقديرده باغدارلر اوزاق مدت گه چه محصولات لريني سقلي آله ديلر ديب تاكيدلشدي.بدخشان ولايتي زراعت اداره سي ريسي ديدي سونگي ييل لر جريانيده بيرقطار موسسه لر بدخشانده موزخانه لر ايجاد ايتيش ده دهقانلرگه ياردم بيرديلر و حاضر محلي موزخانه لر باغدارليك محصولاتي ني سقلش ده مثبي نتيجه بيرگن. عيني جنابلري علاوه ايتي محلي باغدارلرتمانيدن بدخشان ده ايجاد ايتيلگن باغ لردن علاوه سونگي نيچه ييل جريانيده مينگ لبچه باغلر بيرقطار موسسه لرنينگ ٥٠ فايزليك ياردمي بيلن بدخشان ايجاد بولگن.

بدخشان زراعت اداره سي ريسي ، بدخشان ده باغدارليك مدنيتي سونگي ييل لرده كوزگه كورنرليچه رواجلنگني ني تصديقلب و بو اداره باغدارلرگه زمانوي باغدارليك سيستمي ني اورگتيش گه سعي و حركتي ني باشلب و ايشانچلي بازار، ذخيرگاه و موزخانه لرني ايجاد ايتيش بيلن بو قتلم ني قوللب قوتلش ده دقت اعتبارلر آشيريلگن ديدي.