بدخشان ده ترتیب سیزآولش کوپیگنی؛ ” خالدار” بلیغ نسلی بوتکل یوقالماقده
neshananews
11 July 2020بدخشان ولایتی اطراف محیط مسول و ایشبلرمانلری، سونگی وقت لرده بو ولایت ده بلیغ آولش مثلی کورینگمن درجه ده کوپیب باریشی دن تشویش اظهارایتیب بو وضعیت دوام ایتیب باریشی بدخشان ولایتی نینگ بیرقطار تومنلریده تورلی خیل بلیغ لرنسلی بوتکل نابود بولیشی نی آگاهلنتیرگن لر. اولرگه کوره بلیغ آوچی لری، جنراتوربرقی، قول بامبه لری و کمیاوی ماده لرگه آغشته معیاری بولمگن جاللروسیله سی بیلن بدخشان دریالریده بلیغ آولیدیلر و مسول ارگانلرتمانیدن بو ناقانونی ایشلرآلدینی آلیش اوچون هیچقندای چاره تدبیرعملی بولمیدی.
بدخشان ولایتی اطراف محیط اداره سی باشلیغی شبیرملک‌زاد، قانون بوزر کیشی لرگه نسبتا” قانون تطبیق ایتیلمگنی سبب اطراف محیط نی سقلش بویچه ناقانونی ایشلر بوولایت کوپیب بارماقده دیب و بو حرکت جانوارلر خصوصا تورلی خیل بلیغ لرحیاتی نی جدی خطرگه یوزمه یوزقیلگن دیب تاکیدلشکن. اونگه کوره، دولت و طالبان حاکمیتی آستیده بولگن منطقه لرده بلیغ آولشی بیربیریدن اونچه فرق یوق و بوترتیب سیزشکار عاقبتیده اوته لذت لی و گوزل « خالدار بلیغ » نسلی بوتکل یوقالیشی خطری بیلن یوزمه یوزدیر.
بو ولایت اطراف محیط اداره سی باشلیغی علاوه ایتی بلیغ آوچی لری کوچلی جنراتورلر برقی نی دریاگه تاقه دیلر و اونی نتیجه سیده دریاسویی گه یشه‌یاتکان برچه جاندارلرنابود بوله دیلر. ملک‌زادجنابلری، اطراف محیط نی سقلش اداره سی بو خصوصده اوز خواتیر و تشویشی نی نیچه بار رسمی مکتوبلر ارقلی محلی حکومت و امنیتی قوتلررهبریتی بیلن شریک قیلگن اما اونگه کوره حاضرگه قدر بو توغریده بیران ایجابی ایش عمل گه آشیریلمگن .
عینی دمده بدخشان ولایتی اطراف محیط متخصصلریدن بیری غلام نبی سرفراز، بدخشان ولایتی نینگ برچه تومن و قشلاقلریده بلیغ آولش سونگی آی لرده بیرحد کوپگنی دیب اگر مسول ارگان لربو توغریده جدی اعتبار قرتمسه لرو ترتیبسیز بلیغ آولش آلدینی آلمسه لربدخشان دریالریده حیات کیچیره‌یاتکان بلیغ و تورلی جاندارلر نسلی بوتکل نابود بوله دی دیب آگاهلنتیرماقده.
بو متخصص محلی دولت مسوللری و تیگیشلی بولگن اداره لردن، جنراتور، قول بامبه، کیماوی ماده لرگه آغشته بولگن جاللروسیله سی بیلن بلیغ آولمیشی آلدی آلینمسه بو جاندارلر نسلی بوتکل یوقاله دی و محلی اداره لر بو خیل جاندار و خصوصا کمیاب بلیغ لرنی نسلی یوقالیشی آلدینی آلیش اوچون اولرنی پرورش و حیاتی علاحیده محللرتعین لش لری لازم دیدی. سرفراز جنابلریگه کوره، زیباک تومنی نی « توپخانه» و کران و منجان اولسوال لیگی نی « انجمن » منطقه لریده نیچه موجود طبیعی حوض لر بولمگن تقدیرده حاضر بدخشان ولایتی ده تورلی خیل بلیغ لرنسلی بوتکل نابودبولردی دیدی.
باشقه تماندن محل یشوچی لری هم اوتمیشه ده محل لریده‌گی دریالر بلیغ دن توله ایکنی اما بیرییل دن بیری اکثر دریالرده بلیغ لر کمیب باریشی و عموما” تورلی بلیغ لردن بوشب قالیشی نی تصدیق لیدیلر. شهدا تومنی یشوچیلریدن بولگن صبغت الله ، اکثر بلیغ آوچی لر جنراتور دن فایده لینیب و بوطریقه دن استقاده قلیش تورلی خیلی بلیغ لرنسلی نی بوتکل نابود قیلگن دیدی. شهدا تومنی نینگ بو یشوچی، امنیتی و دولتی ارگان لرتمانیدن هیچقندای ممانعت بولمگنی سبب سونگی وقت لرده جنراتوردن و پاکستانی جاللردن استفاده قلیش بی حد کوپیگن دیدی.
بدخشان ولایتی اطراف محیط اداره سی طبعی میراثلرنی سقلش بولیمی مسولی ضیاالحق کامران، جنراتور و قول بامبه وسیله سی بیلن ناقانونی بلیغ آولش کوپیگنی دن علاوه بهارموسومیده جاری بوله یاتکان سوتاشقین لرههم تورلی خیل بلیغ لر نسلی نی کمیشی و نابود بولیشی گه مثبی تاثیرقالدیرگن دیب ایتکن.
اونگه کوره بو اداره بدخشان ولایتی ده بلیغ آولش نی منع ایتکن برچه قانون و طرزالعمللرنی تیگیشلی اداره لرگه یوبارگن اما بوناقانونی ایش آلدینی آلیش اوچون مسول ارگانلر اعتبار و دقت قرتمگن لیک لری سبب قانون عملی بولمی و بو سعی و حرکت لرهم مثبی نتیجه بیرمگن .
باشقه تماندن بدخشان ولایتی اکثر یشوچی لری، بلیغ آولش ده حکومت مسوللری و خصوصا” حربی قوتلرملازم لری بیواسطه دخلدار بولگنی نی اورته گه قویب بدخشان محلی رسمی لری نینگ مهمانلیگی ده بلیغ اولرنی دسترخوانی نی گوزللشتیریلگن یگانه طعام دیردیدیلر.
بدخشان امنیتی مقام لرایسه ، ولایت مرکزی و برچه اولسوال لیک لرده‌گی امنیتی ارگان لرگه بلیغ نی ناقانونی آولشی آلدینی آلیش دن بویروع بیرگنلیک لرینی اورغولشماقده. بدخشان ولایتی امنیه قوماندان لیگی سوزچی سی ثناالله روحانی، بدخشان پولیسی برچه قوتلریگه وحش حیاتی و بلیغ آولشی آلدینی آلیش ده بویروغ صادر ایتکن و بلیغ آولیشی ناقانونی ایکنی و امنیتی قوتلر هیچقچان ناقانونی ایشگه قول اورمیدیلردیب تاکیدلشدی.
بونگه قره‌مسدن بدخشان ولایتی اطراف محیط اداره سی مسوللری بو ولایت ده وحش حیاتی نسلی ترتیب سیز شکار نتیجه سیده جدی تهدیدلرگه یوزمه یوز ایکنی نی تشویش بیلدیرماقده. مسول ارگانلر هرچند کوپ مراتبه ناقانونی آولش آلدینی نی آلیش دن سوزیورتکن اما اطراف محیط ادراه سی رسمی لری و طبیعی منبع لر متخصص لریگه کوره حاضرگه قدر هیچ بیرشخص وحشی حیوان لر یا کمیاب بلیع لرناقانونی آولیشی عیب لو بیلن توتقین ده آلینیب جزالنتیریلمگن دیب ایتماقده لر. متخصص و مسوللرگه کوره بو موضوع سبب بدخشان ولایتی ده آولش کون اوتیشی بیلن آرتیب بارماقده.
