بدخشان پوليسي گه كوره جاري ييل ده مخدره ماده لر قاچاقي لري گه قرشي كورش اوجون يوگه قويلگن ٦٠ عمليات نتيجه سيده ٨٧ كيشي مخدره ماده لر قاچاقي عيبلوي بيلن توتقين دن آلنيب مينگ لرچه كيلوگرام مخدره ماده ضبط ايتلگن.

بدخشان امنيتي مسول لري اشبو عيبلوي بيلن توتقين ده آلينگن بوكيشي لرنينگ بيرقطار دوسيه لري قضايي و عدلي ارگان لرگه جونتيلگن و باشقه بير قنچه دوسيه لر اوستيدن ايش دوام ايتماقده ديب ايتكن.

بدخشان پوليسي باشليغي اسدالله محمدي، جاري ييل ده بو ولايت نينگ مخدره ماده لرگه قرشي كورش پوليسي قاچاقچي لرگه قرشي ٨٦ عمليات يولگه قويب اوني نتيجه سيده سكيز مينگ كيلوگرام دن كوپراق مخدره ماده لر و اونلب قاچاقچي قولگه آلگن ديب ايتي.

بدخشان پوليس قومانداني بوعمليات لر ده شونينگ قاچاقچي لرگه تعلق لي اونلب نقليه واسطه، قورال يراق هم پوليس قوليگه توشكن ديدي. محمدي جنابلريني ايتيشيجه ” ٢٨ نقليه واسطه و ٨٧ قاچاقچي توتقين ده آلينيب عدلي وقضايي ارگانلرگه تانيشتيريلگن، عيني دمده ٨٤ قول تلفن، ٢١٠ كيلوگرام پارتلوچي ماده،١٠ ميل تورخيل قورال،٤٩٩ اوق و ٨٥٠ مينگ افغاني نقد پول هم ضبط بولگن” ديدي.

بدخشان ولايتي مدني جماعه لر مسولي سيف الدين سياس پوليس نينگ بو سعي و حركتي ني آلقيشلب هلي هم فيض آباد شهري و بير قطار تومن لرده مخدره ماده لر قاچاق بولماقده ديدي.

سياس جنابلري،  مسول لر، چيگره ده جايلشكن تومن لرده فعاليت قيلاتگان قاچاقچي لر و فيض آباد شهربده مخدره ماده ساتوچي كيشي لرني توتقين ده آليشي لازم ليگي تي تاكيدلشدي.

مخدره ماده لرگه قرشي كورش پوليسي مسول لريني ايتيشيچه مخدره ماده لر قاچاقي حاضرچه ليك طالبان نظارتي آستيده بولگن منطقه لر ده دوام ايتماقده.

كوزتوچي لرگه كوره، بدخشان ولايتي كينگ جغرافي حدودي، تاغليك منطقه لر و تاجيكستان، پاكستان و چين بيلن چيگره داش بولگني سبب، مخدره ماده لرنينگ خلق ارا قاچاقچي لري دقت مركزيگه جايلشكن.

بدخشان يشوچي لريدن بولگن غلام سخي جاري ييل ده مخدره ماده لرگه قرشي پوليس تمانيدن يولگه قويلگن اونلب عمليات ني  امنيتي قوتلرنينگ بو زهرلي ماده قرشي كورشده جدي ايكن ليگي دن دلالت بيره دي ديب پوليس شهر و محله لرده مخدره ماده ترقته باتگان پرچون فروش لرگه هم كوپراق اعتبار و دقت قرتيشي لازم ديدي.

بدخشان امنيتي مسول لري عيني دمده جاري ييل ده بيش مينگ هكتار ايكنزارلرگه مخدره ماده لر ايكيلگني و دهقان لردن حمايوي دستورلر توختتيلگني سبب دهقان لر بو بيش مينگ هكتار ايكنزارلردن كتته حاصل آلكن ديب ايتيشماقده.

اما بدخشان مدني فعال لري مخدره ماده ايكنزارلري نابود قيلينمگني سبب بو ماده بازاري قيزيق بوليب بو ولايت ده مخدره ماده استفاده قيلوچي لري ساني كوپيگني دن تشويش بيلديرماقده لر.

هرچند حاضرگه قدر بدخشان ولايتي ده قنچه كيشي بو ماده دن استفاده قيليشي دن انيق معلومات يوق اما ٢٠٠٥ ميلادي ييل ده بيرلشكن ملت لر تشكيلاتي نينگ مخدره ماده لرگه قرشي كورش اداره سي تمانيدن اوتكزيلگن سروي نيتجه سيگه كوره بدخشان ده مخدره ماده لردن استفاده قيلوچي لر ساني ني محلي رسمي لر٥٠ مينگ كيشي ديب ايتماقده لر.

بدخشان ده فعاليت قيلاتگان نادولت ارگانلر بو رقم نشر ايتيليشي دن خاضر اون بيش ييل اوتكن و شبهه سيز بدخشان ده معتاد لر ساني بو رقم دن كوره كوپراق آرتكن ديديلر.

آغاخان بنيادي ني بدخشان ده گي مسولي  داكتر شمس عملي شمس يقين ده ” بدخشان مخدره و چكيم ليك ماده لر تاريخي گذرگاهي ” عنواني بيلن كتاب يازگن.داكترشمس عملي شمس مخدره ماده يعني ناس و سگرت داخل نشه لي ماده لر استفاده قيلاتكان لر رقمي ني ١٥٠ كيشي دن كوپراق ايكني ني تاكيدلشكن.

تورلي خيل مخدره ماده لرگه آسان قول تاپيش، ياشلرني بو ماده لرگه قيزيقتيرگني و معتادلرني دوالش سعي و حركت لر ايجابي تاثير يتكزمكني گه قرگنده، مردم مخدره ماده لر پرچون فروش لريگه قرشي جدي راق و عملي كورش يولگه قويليشي ني كوتماقده لر.