بدخشان ده سوتاشقيني جاني و مالي تلفاتي؛ اوچ كيشي هلاك، بيركيشي يارهلنگن و يوزلب اوي تخريب بولگن
neshananews
30 May 2020بدخشان محلي رسميلري اوتكن ايككي كون جريانيده آغيرياغينگرچيليكلر آرتيدن يوزبيرگن سوتاشقيني سبب بوولايت نينگ بيرقطار تومن لريگه آغير خساره يتكزيليب “شيكي” تومني اهالي سيدن اوچ كيشي دن جان آليب و بيركيشي ياره لنگني دن خبر بيرگنلر.
بدخشان ولايتي طبيعي حادثه لرگه قرشي كورش اداره سي ريسي سيدعبدالله همايون دهقان ديدي شهدا، يمگان، بهارك و شكي درواز تومنلريده جاري بولگن سوتاشقيني نتيجه سيده اونلب حويلي ، يوزلرجريب ايكنزارلر و كوپلب سوكاناللري تخريب بولگن.اونگه كوره بو سوتاشقيني نتيجه سيده يمگان تومنيده ٦٠ اوي، شكي، شهدا، بهارك و كشم تومنلريده ٤٠ اوي و شونينگ ديك فيض آباد شهري نينگ “صتمي” و ” حلقه جر” قشلاق لريده قريب يوز اوي تخريب بولگن.
بدخشان ده خساره كورگن تومن اهالي لري برچه بار و يوقلريني سوتاشقيني سبب قولدن بيرگني ني ايتيب اگر دولت و ياردمچي موسسه لر بو اهاليگه كمك قيلمسه لر اولر كتته كان قيينتچليك لرگه دچار بوليش لري ممكن.
شهدا تومني يشوچي سي و سوتاشقيني ده ايكنزارلريگه خساره يتكزيلگن قربان محمد ديدي” ايكنزارلرده قيلگن برچه خذمت لريم برباد بولدي، روزغارم ني تامين لشده حيران قالگن من.” او دولت و ياردمچي موسسه لردن سوتاشقيني دن ضرر كورگن اهاليكه ياردم كورستيشي ني طلب ايتيب خساره كورگن اهالي ني بو وضعيت دن قوتقريش ده جدي اعتبار قرتيشي ني طلب ايتي.
بهارك تومني يشوچي سي حميدالله هم ديدي يشش اويلري بوتكل تخريب بولگن عايله لر حاضرچه ازاد فضاده كون كيچيريب و حاضرگه قدر اولرگه هيچقنداي ياردم كورستيلمگن.
باشقه تماندن بدخشان ولايتي طبيعي حادثه لرگه قرشي كورش اداره سي ريسي سوتاشقيني سبب يتكزيلكن خساره لرني انيقلشتيريش اوچون تيكشيروچي گروه لر منطقه گه جونتيلگني ني ايتيب خساره كورگن عايله لر ساني معلوم بولگني بيلن ياردم يتكزيله دي ديدي.اونگه كوره بو اداره خادم لري اويلريني قولدن بيرگن عايله لرگه اسيق آذوقه ترقتيش ني باشله گن و بو پروسه دوام ايتيب و سوتاشقيني سبب خساره كورگن عايله لر ساني معلوم بولگني دن سونگ ياردم لر رسمي روشده باشلنه دي.
مملكت شمالشرقيده جايلشكن بدخشان حادثه لي ولايتلر جمله سيدن دير و هر ييلي بو ولايت اهالي سي سوتاشقيني، قاركوچيشي و ييرسيلكنشي سبب كوپلب خساره و جاني تلفات كورماقده لر.بدخشان محلي رسمي لر هرييلي خساره كورگن اهاليگه تيزياردم يتكزيش دن علاوه تورلي خطرلر ليلن يوزمه يوز بولگن منطقه اهالي لريگه يشش نمره لر ترقتيب طبيعي حادثه لردن زيان كوروچي عايله لرني خطردن قوتقريش ده سعي قيلگن لر.
