بدخشان ده طالبان نينگ قيزيل قطعه سي قومانداني اولديريلدي
neshananews
05 October 2020بدخشان ولايتي امنيتي مقامللري گه كوره طالبان گروهي جرم تومني مركزيني اوز نظارتلري آستيده كيريتيش مقصدي بيلن نيچه استقامت دن باشلب و امنيتي قوتلر تمانيدن جدي مقاومت كورستيلگني دن سونگ آغير تلفات كوريب آرقه گه چيكينيش گه مجبور بولگن.
بدخشان پوليسي سوزچيسي ثناالله روحاني ني ايتيشيچه اوتكن كوني ( يكشنبه ١٣ ميزان) توش دن سونگ ساعت ٥ ده باشلنيب كيچه ساعت ١١ گه چه دوام ايتكن توقنشو نتيجه سيده طالبان گروهي نينگ قيزيل قطعه سي قومانداني قاري صابر اوچ قوريقچي سي بيلن اولديريلدي و طالبان گروهي نينگ تنيقلي قومانداني قاري شمسي الله بيش جنگچي سي بيلن ياره لنگن.
بدخشان پوليسي سوزچيسي گه كوره حاضرچه طالبان جنگچي لري هجومي دفع ايتيلگن و و وضعيت عادي حالت گه قيتكن.
جرم بدخشان نينگ ناتينچ تومنلريدن بيري دير و اوني كاتته قسمي طالبان نظارتي آستيده دير و سونگي ييللرده امنيتي قوتلر و طالبان جنگچي لري ارا قانلي توقنشولرگه گواه ايكن.
بدخشان محلي رسميلريگه كوره افغانستان حكومتي و طالبان گروهي ارا صلح مذاكره لري باشلنگني دن سونگ جرم تومنيگه قرشي بو طالبان نينگ اوچينچي ييريك هجومي دير كه امنيتي قوتلر تمانيدن دفع ايتيلگن.
