بدخشان ده قار موسومي باشلنگي؛ مردم طبيعي واقعه لرگه نسبتا” حكومت جوابگرليك قيله آلمسليگي دن تشويش ده
neshananews
30 September 2020بدخشان ولايتي بيرقطار تاغليك تومنلريده قار ياغيشي باشلنگن. جاري ييل نينگ ايلك قاري بو ولايت نينگ اون اولسوال ليگي گه آق كييم كيديردي.
بدخشان ولايتي محلي رسمي لري و ولايت كينگاشي اعضالري، شدت لي قار ياغگن تقديرده، بو ولايت اكثر تومنلري خصوصا چيگره حدودلرده جايلشكن اولسوال ليك لر قتناو يوللري ياپيليشي ممكن ديب آگاهلنتيرگنلر.
جاري ييل نينگ ايلك قاري اوتكن يريم كيچه( سه شنبه ٨ ميزان) باشلنگن. هرييلي بدخشان نينگ چيگره ده جايلشكن تومنلري عموما” ميزان آيي ده ياغينگرچيليك لرگه گواه بوله دي. بدخشان ولايت حاكمي سوزچيسي نيك محمد نظري نشانه خبر آژانسي بيلن صحبت ده ديدي اوتكن كيچه بدخشان نينگ اون دن آرتيق تومني قار ياغيشي گه گواه بولدي. اونگه كوره كوهستان، راغستان، ياوران، تگاب، ارغنج خواه و چيگره ده جايلشكن باشقه آلتي تومنده قار ياغگن.
بدخشان ولايتي تاغليك ايكني و يوللري استسي روشده قوريلمگني سبب هرييلي قلين قار ياغيشي و قتناو يوللري ياپيليشي گه گواه بوله دي. بونگه علاوه قاركوچيشي كبي طبيعي واقعه لر هرييلي بو ولايت نينگ چيگره ده جايلشكن تومن اهالي لريگه كاتته معما و قيينتحيليك لر توغديره دي.
بدخشان ولايت كينگاشي اعضالري هرييلي طبيعي واقعه لرگه نسبتا” دولت اداره لري جوابگرليكي و خصوصا” قاركوچكن منطقه لرده بند بوليب قالگن عايله لرني قوتقريش عمليات لري دايم معما بيلن يولداش ايكن. ملت وكيللرگه كوره هرييلي بدخشان تومن لري يوللري ياپيليب قاليشي سبب مردم كوپ قيينتچيليك لرگه دچار بوليب و محلي حكومت هم هرييلي قيش موسوميده طبيعي واقعه لرگه قانعقرلي جواب بيريش و صدمه كورگن اهاليگه ياردم يتكزيش اوچون بير معين ميكانيزم قول اوستيگه آله آلمگن.
بدخشان ولايت كينگاشي معاوني طلب الدين قادري ديدي طبيعي حادثه لردن صدمه كورگن اهاليگه ياردم يتكزيش كيچگه قاليب در حقيقت سهراب اوليمي دن سونگ نوشدارو گه اوخشي دي؛ چونكه اونگه كوره هر بير حادثه دن كيين قتناو يوللر ياپيق بولگني باعث يير آرقلي ياردم يتكزيش ناممكن بوليب و هوا آرقلي ياردم يتكزيش اوچون هماهنگ ليك كيچگه قاليب حتي ايريم حالت لرده شاشلينچ ياردملر بير آي دن سونگ محل ده يوباريلگن.
بدخشان ولايت كينگاشي اورين باسري، بيرتماندن بدخشان نينگ اوزاق توشكن تومنلريده ساغليك سقلش معياري خذمت لر و ييترليچه آذوقه ذخيره لري بولمگني و باشقه تماندن اكثر تومنلر قتناو يوللري ياپيلگني بو تومن يشوچيلري ني جدي تهديدلرگه دچار قيله دي.
عيني حالده بدخشان محلي رسميلري، مردم گه باردم يتكزيش اوچون دولت و ياردمچي ارگانلر تمانيدن كيركلي تيارگرليك لر آلينگن دبيب بيران اچنرلي واقعه يوزبيرگن تقديرده صدمه كورگن اهالي گه تيزليكده ياردم يتكزيليشي دن ايشانچ بيلديگن. بدخشان ولايت حاكمي سوزچيسي ديدي برچه تومن لرده فوق العاده حالت لرده باردم يتكزيش اوچون استراتيژيك انبار لر ايجاد ايتيلگني دن علاوه، برچه ياردمچي ارگان و موسسه لر جمله دن جهان آذوقه تشكيلاتي بيلن كيرك لي هماهنگ ليك برقرار دير ديدي.
هرچند بدخشان محلي رسميلري دايم طبيعي حادثه لرگه نسبتا جوابگرليك و تومنلرده استراتيژيك ذخيره گاه لر ايجاد ايتيلگني دن سوز يورتكنلر اما محل بشوچيلريگه كوره بو وعده هيچقچان عملي بولمگن و محلي حكومت حادثه يوز بيرگن زمانلرده صدمه كورگن اهالي گه ياردم يتكزيش ده ناكام ايكن ديب تاكيدلشكنلر.
