قزان قويش صنعتي بدخشان ده اينگ قديمي محلي صنعت دير. بو صعنت ايشلب چيقاره ياتكان اشيالر بازاري اوتميش ده يخي رونق گه ايگه ايدي و بو توغريده محنت تارته ياتكان صنعتگرلر اوز روزغارلريني شو صنعت دن تامين لب محلي اقتصاد رواج رونقي گه هم دقت گه سزاوار حصه قوشيب كيلرديلر. اما بو صنعت حاضرچه ليك پلاستكي و چينايي ليك اسيالر بازارده كوپيگني و دولت تمانيدن حمايت بولمگني سبب رونق دن توشيب بازاري اوتميش گه قرگنده بوتكل كساد گه اوچرشكن.

ساني آز و قول برماقلريچه بولگن بو صنعت محنتچيلري. شهدا تومني نينگ بير قشلاقيده عنعنوي طرزده ايشدن توشكن تيمير تقه لرني ييرتيب قزان و باشقه اسباب اسكونه لرني تيارلب بازارگه يتكزه ديلر. بو صنعتگرلر بيرينچي دن تيمير تقه لرني ييرتيب و اوندن قوش هوكوز گه تيش، قزان، چايني، چاي جوش و شونگه اوخشه گن اوي اسبابلري تيارليديلر.

بدخشان ده تيش ريزليك بير كارخانه ايگه سيدعبدالروف رحيمي بيز ايشلب چيقاره ياتكان اسباب اشيالر اوتميش ده يخيشي بازارگه ايگه ايدي و شو كسب آرقلي بيز كونده ليك روزغار ميزني اوتكزرديك ديدي. اما حاضر او ايتي:” حاضرچه چينايي و پلاستكي اسباب و ايديشلر بازاري قيزيق بولگني و دولت تمانيدن بو صنعت رواج رونقي اوچون قنداي بير حمايت كورستيلمگني سبب تيش ريزليك صنعتي بازاري بوتكل كسادگه اوچرشكن.”

تيمير دن يسلگن اشيالر ايشلب چيقاره ياتكان بو كارخانه ده، ايشچي لر، اوته عنعنوي اسباب اسكونه لر جمله دن لاي دن تيارلنگن قالب لر، اوت كوره سي، چكش و سندان بيلن تورلي خيل نكلي ايديش لر تيارليديلر. بو ايشچي لر ايش دن توشكن تيميرتقه لر بازار ساتيب اليب اوني ييرتيب اوندن تورلي خيلي ايديش لر تيارلب بازارگه ساته ديلر.

رحيمي جنابلريگه كوره اگر حكومت و حمايه چي ارگان لر بو صنعت دن حمايت ايتسه لر و ايشلب چيقاراتكان اشيالري اوچون مناسب بازار مهيا ايتيلسه بو مارخانه فعاليتي كينگيتيريب ايش قديريب يوروگن كيشي لرگه ايش و درآمد زمينه سيني مساعد ايتيب محلي اقتصاد رواج رونقي ده مثبي حصه قوشه آله ميز ديدي.

رحيمي جنابلري باله ليك دن بو صنعتي بيلن اوسكن.او ديدي انچه ييل لر آلدين آتم ني دوكاني دن بو صنعت ني اورگنيب آلديم اما حاضر نه آتم قالدي و نه هم قديمي صنعتكارلر و بو صنعت مشتاق لري. رحيمي جنابلريني چندان مشتري سي يوق. او هركوني خريدار كيليشي ني كوتيب توره دي، اما كورينيشي دن چينايي و پلاستكي ايديش لر بو صنعت بازاريني شكست بيرگن. اوني معلوم قيليشيچه:” اوتميش ده يخشي بازارميز بارايدي بازارده نيچه قزان و تيش ريزليك محصولاتي دوكاني بارايدي، اما صنعتچي لردن بير قطاري عالم دن اوتي و بير قطارل ي نم بو كسب ني ترك ايتيلر.”

بو صنعتچي لرني هرچند كه يخشي بازارلري يوق اما بونگه قره مسدن ايشدن توشكن تيمرلرني ييرتيب اوز ايشلريني دوام ايتيرماقدهلر. رحيمي جنابلري بو كسب بيلن يخشي كون كيچيرگني ني ايتيب و مردم بدخشان نينگ اوزاق توشكن تومن و قشلاقلردن گليتي و نكلي ايديش ساتيب آليش اوچون اوني نزيده مراجعه قيليش لريني ايتي.

گليت و نكل دن يسلگن ايديش لرني ساته ياتكان بدخشانليك دوكاندار عبدالخليل، محلي محصولات صفتلي بولگني اوچون هلي هم مشتري سي بار ديب، اما اوتميش ده گي رونقي يوق ديدي.

بو دوكاندار علاوه ايتي:” مردم بيزني اكثر محصولات ميزدن اوقات ايديش لري اوله راق فايده لنه ديلر و بو صنعت ني رواج رونق تاپيشي ايش زمينه لريني مهيا ايتيش و كمبغل ليك ني يوقاتيش ده مهم رول اوينه آله دي.”

عيني حالده بدخشان اقتصادي تحليلچي سي عبدالغفور فروغ، بو صنعت اوتميش ده گي حكومتلر دقت سيزليگي و چينايي و پاكستان اشيالر بازاري رونق تاپكني سبب كسادگه اوچره گن ديب ايتي.فروغ جنابلري ديدي:” اوتميش ده نه فقط تيش و قزان ريزليك بلكه باشقه محلي صنعت لر جمله دن مسگرليك، چرمگرليك، اياغ كيمي تيكيش، اله چه توقيش و شونكه اوخشه كن باشقه صنعت لر بدخشان ده يخشي بازارگه ايگه ايدي و مردم اقتصاد جهتي دن محتاج ايمسديلر و احتياجلريني محلي محصولات دن تامين ليديلر.” اونگه كوره اما حاضر دولت تمانيدن حمايتي دستورلر بولمگني سبب بو صنعت لر يوقالماقده.

عيني حالده بدخشان ولايتي محلي رسميلري نيچه ييل دن بيري محلي صنعت ني رواجلنتيريش و حمايت ايتيش ايشي ني محلي صنعت ترقيات پلانيده كيرتكنلريدن سوز يورتماقده لر. بدخشان اقتصاد اداره سي رييسي عبدالحسيب دقيق، محلي صنعت ني قيته تيكلش و خصوصن قزان قوييش دن حمايت ايتيش ني اقتصادي ترقيات دستوريده كيريتيلگني دن خبر بيريب و بو اداره مسووللري بو صنعت دن حمايت ايتيش بيلن بو ولايت ده محلي صنعت ني قوللب قوتلش ده سعي قيلماقده لر ديدي.

بدخشان ولايتي اقتصاد اداره سي رييسي علاوه ايتي شوحاضر محلي صنعت محصولاتي ني ساتيليشي اوچون نيچه ماركيت قوريلماقده و بو بازارلرني كينگيتيريش و محلي محصولات اوچون بازار تاپيش بيلن، بير تماندن اهاليگه ايش زمينه سيني و باشقه تماندن محلي اقتصادني رواجلنتيريش شرايطي ني مساعد ايتماقچي لر.

بدخشان اقتصاد اداره سي رييسي گه كوره بو ماركيت لر بدخشان مركزي فيض آبادشهري و شهدا، بهارك، اشكاشم، شغنان،سبزي بهار و خواهان تومنلريده قوريلماقده و بو ماركيتلر بنالري بيتكزيليشي بيلن مناسب فرصتلر صنعتچي لر و محلي محصولات سودا ساتيقي اوچون مساعد ايتيله دي.

بدخشان محلي رسميلري بو صنعتلر قيته تيكلنيشي محلي اقتصاد ايلديزي قوللب قوتلنيشي ده كاتته اهميت گه ايگه بولگني ني اورغولب بيرتماندن مردم گه ايش زمينه سي مهيا بوليب و باشقه جهت دن محلي اقتصادي چرخي حركت گه توشه دي ديب ايتماقده لر.بدخشان محلي مسووللري، محلي صنعت خصوصن قزان قوييش صنعتي كسادگه اوچرشيشي آلديني آليش دولت اداره لري رويخطي باشيده جايلشكني و اشبو مقصد اوچون محلي اقتصاد ترقيات ريجه سيده بو صنعت ني قيته تيكلش دستلبكي دستور بولگني ني تاكيدلشماقده لر.