١٤٠٠ شمسي ييل نينگ كانكور سيناوي بدخشان محلي رسميلري و عالي اوقويورت وزيرليگي هيات لري حضوريده بو كون باشلندي. بو سيناو بيش علاحيده حوزه ده اوچ كون مدتيده اوتكزيليشي ريجه لنگن.
بو سيناونينگ بيرينچي باسقيچي بوكون ( پنجشنبه ٣٠ ثور ) بدخشان عالي اوقويورتي و باشقه تورت محلده اوتكزيلدي.بدهشان عالي اوقويو يورت باشليغي محمدقاسم آريا ديدي:” بدخشان ولايتي كانكور سيناوي، عالي اوقويورت وزيرليگي و بدخشان عالي اوقويورتي دستوريگه مطابق مركزي حوزه فيض آبادشهري و بهارك، شغنان، درواز و خواهان تومنلريده اوتكزيلگن.”
بدخشان ده جاري ييل كانكور سيناويده ١٠ مينگ و ٨٢٧ طلبه اشتراك ايتماقچي و بولردن ٦ مينگ و ٦٨ كيشي سي ايركك طلبه لر و ٤ مينگ و ٧٥٩ كيشي سي قيز طلبه لر بولگن.
عالي اوقويورت وزيرليگي تمانيدن جونتيلگن هيات باشليغي عبدالشكور داور هم ديدي:” جاري ييل كانكور سيناويده طلبه لرني رويخط ده آليش و بايمتريك ايشلريده جدي اوزگريشلر كيريتيلگن و بوندن مقصد سيناوي شفافيتي و هرقنداي قلابكارليك لر آلديني آليش دير.”
بدخشان ولايت حاكمي اورين بايري اخترمحمد خيرزاده كانكور سبناوي تينچ فضاده اوتكزيليشي اوچون محلي حكومت لازم بولگن چاره تدبيرلرني يولگه قويب سعي و حركت قيلگن ديدي. خيرزاده جنابلري عالي اوقويورت وزيرليگي و بدخشان محلي اداره سي كانكور سيناويني بوييل بيش حوزه ده الماقچي ديب و علاحيده حوزه لرني ايجاد ايتيليشي كانكور سيناوي قتنشچي لريگه ايجابي بوليك ني يرتيش اوچون بولگن ديدي.
عيني حالده مركزي حوزه ده كانكور سيناويده قنتشكن بير قطار طلبه لر كانكور شرايطي اوتكن ييللرگه قرگنده بو ييل بير آز قيينت راق بولگني ني ايتيب اما قبول قيلينرلي نتيجه آليش ده اميد بيلديرگن در.
بدخشان ده كانكور سيناوي فيض آباد، بهارك، شغنان، نسي، درواز و خواهان حوزه لريده هرييلي اوتكزيله دي اما اوتكن ييللرده كانكور قتنشچيلري چيگره ده و اوزاق توشكن تومنلرده هوا ساووغليگي سبب كوپ گينه قيينتچيليك لرگه دچار ايديلر، اما حاضر كانكور سيناوي زماني اوزگرگني باعث هوا ساووغليگي معماسي برطرف ايتيليب ليكن امنيتي معمالر موجود دير.
اوتكن ييلي طالبان قيز طلبه لرني كانكور سيناويده قتنشيش گه ممانعت قيلگني سبب كوپ قيز طلبه لر راغستان، كوهستان، يمگان، جرم، وردوج، نسي و مايمي تومنلريده بو سيناودن محروم قالگنديلر.
محلي رسميلر نشر ايتكن معلوماتلرگه كوره طالبان ممانعت قيلگن قريب ايككي يوز قيز طلبه جمهوررييس فرماني و عالي اوقويورت وزيرليگي سعي و حركتي گه اساسن اختصاصي روشده سيناوني اوتكزديلر.
بدخشان ولايتي تاغليك بولگني و خوفسيزليك معمالر سبب بو ولايت ده كانكور سيناويني اوتكزگن طلبه لرني مملكت عالي اوقويورت لريده يول تاپيش ساني آز دير و بو موضوع بو ولايت يشوچيلري تنقيدلريگه سبب بولگن.
هرييلي بدخشان ده كانكور سبناويني اوتكزكن طلبه لردن آز سانده مملكت عالي اوقويورتلريگه يول تاپه ديلر و بو موضوع بدخشانليك ياشلرني اميدسيزلنتيرگن.