بدخشان ده ناتينچليكلر كوپيگني و عياللر فعاليتي دايره سي چكلنيب قالگني آرتيدن بو ولايت ده عياللر اقتصادي فعاليتي كميشي دن تشويشلر هم آرتكن. بدخشان ده عياللردن حمايه ايتوچي فعاللرني معلوم قيليشيچه ناتينچليكلر كوپيگني سبب اوتكن ييللرده عياللر حاصل قيلگن يوتوقلر خصوصا اقتصادي ساحه لرده قولگه كيلگن موفقيتلر جدي خطر و تهديدلر بيلن يوزمه يوز دير و كسبه كار عياللر اوز اقتصادي فعاليتلريني قشلاقلر سطحي ده رواجلنتيريش ده قادر ايمسلر ديب ايتماقده لر.
عياللر حقلريدن حمايه ايتوچي آصفه كريمي ديدي عياللر اوچون ايش زمينه لري مهيا بوليشي آرتيدن بو ولايت نينگ كوپلب عياللري قول صناعتي، سوت محصولاتي پروسسي و تجارتي فعاليتلر ساحه سيده كوزگه كورنرلي يوتوقلر حاصل قيلگنلر اما بو فعاليت لر كولمي يالغيز فيض آبادشهريگه چيكلنيب قالگن.
اونگه كوره بدخشان نينگ بير قطار تومنلريده بوندن آلدين گه چه دوام ايتيب باره ياتكان عياللرني اقتصادي فعاليتلري حاضر امنيتي تهديدلر و ايريم تومنلرده طالبان حضوريگه قرگنده بو تومنلرده بجريلمي دي.
خانم كريمي علاوه ايتي بدخشان بيرقطار تومنلريده اقتصادي برنامه لرني تطبيق قيليش ده قصدلري بولگن كوپلب عياللر حاضر تومنلرده سفر قيله آلميديلر. چونكه اونگه كوره ولايت مركزيدن اوزاقليكده جايلشكن منطقه لرده عياللرني هرقنداي فعاليتي خطرلي دير.
بدخشان ده فعاليت تجارت ساحه سيده قيله ياتكان شبنم خانم هم ديدي هرچند اوتكن ايگرمه ييل جريانيده عياللر فعاليت لري اوچون مساعد بولگن فضا سبب كوپ عياللر ايش ايگه سي بوليب محل اقتصادي يوكسليشي گه مثبي تاثير قالديرگن.اما سونگي سياسي و امنيتي اوزگريشلر عياللرني حاصل قيلگن يوتوقلري و ايش فرصتلريني قولدن كيشي اوچون تشويش گه سالگن.
خانم شبنم ديدي ايككي ييل آلدين گه چه عياللر فعاليتي كولمي بدخشان نينگ سيكيز تومني گه چه ييرلگندي اما حاضر ناقرارليكلر سبب عياللر اوز محصولاتلريني بدخشان مركزيدن باشقه جايلرگه يوباريب ساته آلميديلر.
بو اقتصادي فعال اگر صلح مذاكره لري نتيجه بيرسه و حاضرگي ناقرارليكلر گه نقطه قويلسه عياللر اوز اقتصادي فعاليتلريني كينگيتيريش بيلن محلي و عايله لر اقتصاديني قوللب قوتلش ده ايركك بيلن يان مه يان ييريك رول اوينه آله ديلر.
خانم شبنم علاوه ايتي:” ايريم اجتماعي و مدني چكلولر و عرف و عادتلر گه قره مي، عياللر دهقانچيليك، قول صناعتي و بدخشان بازارلري طلبي گه موافق تورلي محصولاتلرني ايشلب چيقاريش بيلناوز فعاليتلرني كينگيتيريب و تشويشلري برطرف ايتيلگن تقديرده كوپلب عياللرگه ايش و درامد زمينه لريني مساعد ايته اله ديلر.”
عيني حالده بدخشان ولايتي عياللر اداره سي مسووللري و عياللر حقلريدن حمايه ايتوچي فعاللرگه كوره اوتكن ايككي دهه جريانيده عياللر اوچون مساعد بولگن زمينه لرگه قرگنده كوپلب بدخشانليك عياللر اقتصادي فعاليت لرگه يوز توتيب بو فعاليتلر ارقلي عايله لري كونده ليك خراجتلريني مهيا ايتيش دن علاوه محلي اقتصاد رواج رونقي اوچون ييريك حصه قوشكنلر.
بو رسميلرگه كوره بو ولايت ده ناقرارليك ار كوپيگني آرتيدن عياللر يوتوق لري جدي تهديدلر بيلن يوزديرو جاري وضعيت دوام ايتكن حالده عياللرفعاليتلري خصوصا اقتصادي ساحه لرده كميشي و حتي توختتليشي امكان دن اوزاق ايمس.
بدخشان عياللر اداره سي ريسي آلينا غياثي هم ديدي عياللر اوچون ايش زمينه لري مساعد ايتيلگني و بو قتلم فعاليت لريدن دولتي و نادولت اداره لر حمايتي آرتيدن بو ولايت عياللريدن كاتته قسمي تورلي اقتصادي ساحه لرده فعاليت باشلب و اولكه ده اوز حضورلريني تثبيت قيليش ده موفق بولدي لر.
بدخشان عياللر اداره سي ريسي اما بو يوتوقلر ناقرارليكلر كوپيشي بيلن جديدخطرلر بيلن يوزمه يوز دير و اولر عياللرني اقتصادي فعاليتلري كميسي دن تشويش ده ديرلر.
خانم غياثي گه كوره حكومت جهان جماعه سي حمايتي بيلن عياللر ايشلري رواجلنيشي اوچون قولي زمينه لرني مساعد ايتي و بو آقيم ني دستكلش ده هم تعهدي كوچلي دير. خانم غياثي اميد بيلديرگن كه صلح مذاكره لري جريانيده عياللر يوتوقلري قربان بولمسين.
بدخشان عياللر اداره سي رييسي حاضرچه بو ولايت كوپلب عياللر اقتصادي فعاليت لر بيلن بند ديرلر عياللر بو ولايت ده عمومن هوتلدارليك، سوت و قوروق ميوه پروسيسي، قول صناعتي و باشقه درآمدلي ايشلر بيلن بند ديرلر اونگه كوره بدخشان ليك عياللر بو فعاليتلر كولمي بدخشان تومنلريده تارتليشي ني كوتماقده لر.
خانم غياثي ني ايتيشيچه بدخشان عياللر اداره سي بو قتلم فعاليتلريني شهردن باشقه منطقه لرده كينگيتيريش اوون ايريم دستورلرني قول اوستيده آلگن و بازار ده كوپلب عياللرگه ايش زمينه لريني مساعد ايتماقچي.
اما اونگه كوره ناتينچليكلر كوپيگني و صلح پروسه سيده طالبان گروهي ني قوشيلمسليگي در حقيقت بو قتلم گه خواتير توغديرگن.
بدخشان ولايتي عياللر اداره سي مسووللري سونگي ييللرده عياللر اقتصادي فعاليتلري رواج رونقي اوچون عياللرگه تيگيشلي مخصوص بازارلرني ايجاد ايتكن. بو رسميلرگه كوره اگر امنيتي تشويشلر برطرف ايتيلمسه و عياللر فعاليتلريدن هرتمان له مه حمايت لر دوام ايتسه دولتي اداره لر عياللر اقتصادي فعاليتلري كولمي ني كينگيتيريش بيلن بو قتلم رولي ني اقتصادي ترقيات ريجه لريده آشيريب و محلي و ملي بازارلرده فعال عياللر اوچون كوپراق زمينه لرني مساعد ايته آله ديلر.