بدخشان مركزي فيض آباد شهري و ببر تومنلرده ناتينچليك لر آرتيب بارگني سبب بو ولايت امنيتي مقاملري هيت كونلريده خوفسيزليك ني توله تامين لشي اچون تيارگرليك آلگن لريدن ايشانچ بيلديرگن لر.
بدخشان امنيتي مسووللريگه كوره امنيتي ارگان لر هيت كونلريده منتظم خوفسيزليك پلان آلينگني و بو كونلرده ولايت اهالي خواتيرلريني برطرف ايتيش اوچون هرقنداي تروريستي خركت لرگه جواب بيريش دن سوز يورتكنلر.
بدخشان پوليس سوزچيسي ثناالله روحاني ، امنيتي قوتلر هيت كونلريده مخصوص خوفسيزليك چاره تدبيرني ولايت مركزي و درچه تومنلرده قول اوستيده آليب هرقنداي احتمالي تهديدلر آلديني آليش ده تياردير لر ديب ايتكن. روحاني جنابلري ” سيار گيزمه لر، تلاشي مركزلريني ايجاد ايتيش” و گوجوم منطقه لرده بير قطار چاره تدبيرلر بو تيارگرليك لر جمله سيدن بولگني ني ايتكن.
بدخشان پوليس سوزچيسي اشبو مقصد ده ( ملي امنيت، ملي اردو و پوليس) قوتلريدن قوشمه امنيتي گروه ايجاد بوليب خوفسيزليك چاره تدبيرلرني عملي قيليش لريني تاكيدلب هيت مراسم لري خوفسيزليك ني تامين ليديلر ديدي.
بدخشان يشوچيلري اما طالبان تمانيدن هجوملر كوپيگني و ولايت ده جنايي جرملر آرتيب باريشي دن خواتيرده لر.
بدخشان مدني جماعه سي ريسي سيف الدين سايس ديدي اوتكن بير هفته جريانيده يوزگه كيلگن اوزگريش لر سبب بو ولايت مركزي كوپراق امنيتي تهديدلر بيلن يوزمه يوز دير. سايس جنابلري علاوه ايتي: ” اوتكن بير هفته ده طالبان جنگچي لري پوليس نينگ فيض ابادشهريده گي بير پوسته سي اسباب و جهازلريني اوزلري بيلن آليب كيتيلر و شهرده حاكم بولگن باشقه بير پوسته ني تصرف ايتيلر و ولايت حاكم ليگي يقنيده ناقانوني قوراللي شخصلر بو شهر يشوچيلريدن بير كيشي ني آتيب اولديرديلر و اوچ كيشي ني ياره لنتيرديلر.” اونگه كوره اگر بو وضعيت آلديني آليش اوچون جدي چاره تدبير آلينمسه هيت كونلريده ناتينچليك لر و جنايي جرم لركوپيشي ممكن.
پوليس سوزچيسي اما بدخشان مركزي و برجه تومنلريده قوشمه قوتلر تمانيدن سيار گيزمه لر اجرا ايتيليشي بويروغ بيريلگن و هيت مراسم لري اجرا ايتيله ياتكان محللرده جدي خوفسيزليك چاره تدبير احرا ايتيليشي دن ايشانچ بيلديرماقده.
هرچند امنيتي مسوللر هيت كونلريده خوفسيزليك تامين لنيشي دن اهاليگه ايشانچ بيلديرگن اما بدخشان يشوچيلري بو ولايت ده ناقانوني قوراللي گروه لر فعاليتي بو ولايت ده آلدي آلينمسه و طالبان گروهي جنگچي لري هجوملريني دفع ايتيش اوچون حربي عملياتلر اجرا ايتيلمسه بو وقتينچه ليك چاره تدبيرلر جاري وضعيت آلديني آليش و ناتينچليك لرگه نقطه قويش ناممكن ديديلر.