بدخشان ده وحشی حیوان لر یوقالیش خطری دن خواتیرلر
neshananews
09 November 2020بدخشان ولایتی اطراف محیط نی سقلش اداره سی مسووللری ایریم وحشی حیوانلرنی آوچی لرکوپیگنی دن تشویش اظهار ایتیب وحش حیاتی نی سقلش اوچون دواملی سعی و حرکت لر وجودی بیلن، بیر قطار آوچی لر هلی هم وحشی حیوانلرنی ناقانونی آولش ده حرکت قیلگنی سبب بو ولایت ده بیرقطار وحشی حیوان لرنسلی یوقالیشی دن جدی خواتیر بیلدیرگن لر.
بدخشان اطراف محیط اداره سی مسووللریگه کوره، کمیاب وحشی حیوان لر آولنیشی ناقانونی دیر و بو وضعیت دوام ایتیب باریشی، بو حیوانلر نسلی نی بوتکل نابود ایتیشی ممکن لیگی نی تاکیدلشکنلر. هرچند وحشی حیوان لر خصوصا نسل لری آز بولگن حیواانلرنی آولنیشی ناقانونی دیر اما بونگه قره مسدن بو حیوان لر محلی آوچی لر و قوراللی لری وسیله سی بیلن شکاری بو ولایت ده دوام ایتیب بارماقده دیب ایتکن.
بدخشان ولایتی اطراف محیط نی سقلش اداره سی ریسی عبدالبشیر ملکزاد، محل یشوچی لری و ناقانونی قوراللی لرتمانیدن وحشی حیوان لرنی آولنیشی بو اداره گه کاتته کان تشویش توغدیرگن دیب ایتی. اونگه کوره هرچند اطراف محیط نی سقلش اداره سی بیرقطار حکومتی اداره لر و وحشی حیوان لر حیاتی سقلش دفتری هماهنگ لیک وهمکارلیکی بیلن نیچه ییل دن بویان ایریم وحشی حیوان لرنسلی یوقالیشی آلدینی آلیش اوچون سعی و حرکت لرینی دوام ایترماقده اما حاضرگه قدر ایریم کمیاب وحشی حیوان لر نسلی نی یوقالیشی دن قوتقریش گه موفق بوله آلمگن دیب تاکیدلشکن.
بدخشان اطراف محیط اداره سی سرپرستی، مارکوپولو کیهیگی، برقی یولبرس، هایبکس ایشکی و مارخود ایشکی دنیانی اینگ کمیاب وحشی تورلری جمله سیدن دیر که بدخشان نینگ پامیر تاغ لریدن یشیدیلر و بو حیوان لر نسلی کون اوتیشی بیلن یوقالیب بارماقده دیدی.
محل یشوچی لری هم بو ولایت نینگ چیگره حددودلریده محلی زوانلر و قوراللی لرهر کونی تاغ لرده بو حیوانلرنی اولش ده سعی قیلیشلریدن سوز یورتکن. اهالی گه کوره امنیتی قوتلر قوماندان لری آوچی لرگه قورال و اوق بیریب و اولردن حمایت ایتیش بیلن بو کمیاب حیوانلرنینگ یوقالیشی گه زمینه یرتماقده دیب ایتکنلر.
عینی حالده بدخشان ولایتی امنیتی مسووللری بو ادعالرنی رد ایتیب، امنیتی قوتلرنه فقط وحشی حیوانلرنی ناقانونی شکاریدن وازکیچکن بلکه بو وحشی حیوانلر شکارینی دایم آلدینی آلیشکن دیدیلر. بدخشان ولایتی پولیس سوزچیسی ثناالله روحانی، امنیتی قوتلر تمانیدن وحشی حیوانلرنی آولنیش موضوع سینی بو اداره جدی کوریب چیقه دی و بو ایش گه قول اورگن لرگه قرشی جدی مناسبت کورستیله دی دیب ایتی.
بدخشان ولایتی اطراف محیط نی سقلش اداره سی مسووللری، بدخشان ده وحشی حیوانلر حیات کیچیره یاتکان منطقه لر واخان اولسوال لیگی ده جایلشکن عموما پامیر تاغلری و دهلیزلری دیر. مارکوپولو کیهیگی، برفی یولبرس، نصواری خرس، مارخور ایشکی، هایبکس ایشکی و خاکتسری بوری نسللری نیچه ییل دن بیری بو منطقه ده یوقالیش خطری بیلن یوزمه یوز دیر.
بدخشان نینگ تاغلیک جغرافی سی بو وحشی حیوان لر حیاتی اوچون اوته مناسب محل دیر. جهان مقیاسی ده شهرت گه ایگه بولگن مارکوپولو کیهیگی عموما هیمالیا تاغلری و چین نینگ ایریم تاغلیک منطقه لری و بدخشان نینگ پامیر تاغلریده حیات کیچیرهه دی. بوندن نیچه دهه آلدین مارکوپولو کیهیگی، برفی یولبرس، مارخور و هایبکس ایشکی بدخشان نینگ تاغلیک منطقه لری و خصوصا پامیر تاغلریده گروهی طرزده یشردی اما اوروش و ناتینچلیک لر و ترتیب سیز شکار سبب بو وحشی حیوانلر نسلی یوقالیش خطری بیلن یوز مه یوزه بولگن.
هرچند بدخشان ولایتی اطراف محیط اداره سی مسووللری برفی یولبرس، مارکوپولو کیهیگی و هایبکس ایشکی سی نسل یوقالیش خطرینی برطرف ایتکنلریدن سوز یوروتکن اما محل یشوچی لری و اطراف محیط متخصص لری بو جانورلر نسلی حاضرچه لیک یوقالیش خطری بیلن یوز مه یوز ایکنی دن اگاهلنتیرماقده لر. محل یشوچیلریدن بیری منیراحمد، مارکوپولو کیهیگی، برفی یولبرس و مارخورایشکی رحمسیزلیک بیلن ناقانونی قوراللی لرتمانیدن هر کونی آولنه دی دیب خبر بیرگن.
منیراحمد، اوتمیش ده منطقه ده وحشی حیوان لر گله لری اوته کوپ بولگنی اما ترتیب سیز شکار کوپگینی سبب حاضرچه لیک بو کمیاب حیوانلر سانی بدخشان تاغ لریده کوزگه کورنرلیچه کمیگن دیدی.
باشقه تماندن بدخشان ولایتی اطراف محیط اداره سی سرپرستی، بدخشان جغرافی سی وحشی حیوان لر حیاتی اوچون اوته مناسب محل بولگنی نی اورغولب اما بو حیوان لر آولنیشی وحش حیاتی نی جدی خطرلر بیلن یوز مه یوز قیلگن دیدی. اونگه کوره مارکوپولو کیهیگی، مارخور و هایبکس ایشکی نسلی نابود بولیشی خطری بیلن یوز مه یوز بولگن حیوان لر جمله سیدن ایکنی نی ایتیب حتی چیگره قوریقچی قوتلر و محلی پولیس و ناقانونی قوراللی تمانیدن آولنیشی نی تاکیدلشکن.
عینی حالده بدخشان مدنی فعاللری، اگر بدخشان وحش حیاتی نی بیر مهم طبعی منبع اوله راق سقلش اوچون ایجابی چاره تدبیر کورینمسه بو حیوان لر ترتیب آولش کوپیگنی سبب بوتکل نابود ایتیلشی دن آگاهلنتیرگن.
باشقه تماندن بدخشان ولایتی دهقانچیلیک و چاروادارلیک اداره سی مسووللری وحشی حیوان لر شکاری کون اوتیشی بین کوپیب بارگنی نی تصدیقلب دیدیلر بو اداره WCS یا وحش حیاتی دن محافظ قیلوچی موسسه سی همکارلیگی بیلن وحشی حیوان لردن محافظت قلیش و مردم گه معلومات یتکزیش بویچه ینگی دستورنی باشله گنی دن خبر بیرگن. واخان طبعی منبع لر و ملی پارکی مسوولی ضیاالدین حمیدی دیدی بو اداره افغانستان چیگره حدودلریده ناقانونی قوراللی کیشی لر تمانیدن وحشی حیوان لر شکاری تاباره کوپیگنی دن تشویش ده دیر دیب اگر بو توغریده دقت اعتبار قرتیلمسه بو ولایت ده کوپلب وحشی حیوان لر نسلی یوقالیش خطری بیلن یوز مه یوز بولیشی حتمی دیدی.
بدخشان نینگ پامیری بیرقطار کمیاب وحشی حیوان لر یشش محلی دیر. بدخشان اطراف محیط اداره سی مسووللری بو حیوان لرنسلی سونگی ییل لرده بوتکل نابودلیک خطری دن قوتقریلگنی نی تاکیدلب لیکن ناقانونی قوراللی لر تمانیدن بو کمیاب حیوان لرنی آولنیشی دوام ایتیب باریشی بو جانورلر نسلی نابود ایتیلشی خطرینی قیته اورته گه چیقارگن.
