محلی رسمی‌رسمیلر بو ولایت ده کوکنار ایکینزارلرینی بوزش کمپاینی یولگه قویلگنی دن خبربیرگنلر.بو کمپاین بیرآی دوام ایتیشی کوتیلماقده.

بدخشان ولایتی نینگ مخدره ماده لرگه قرشی کورش اداره سي مسووللرینی ايتيشيچه کوکنار ایکینزارلرینی نابود ایتیش کمپاینی اوتکن کونی ( دوشنبه ۳جوزا) بدخشان نینگ ارگو اولوسوالیگی ده یولگه قویلگنی و دولت نظارتي  آستیده بولگن منطقه لرنی بو ایکیم دن بوتکل تازه لنگنی گه قدر دوام ایتیشی دن خبر بیرگن.

بدخشان ولایتیده مخدره ماده لر ایکیمی، قاچاقی و ایکینزارلرینی بوزیش وضعیتی ني تیکشیریش مقصدیده بو ولایت گه سفر قیلگن ایچکی ایشلر وزیرلیگی ني مخدره ماده لرگه قرشی کورش اورین باسری محمدهاشم اورتاق، مخدره ماده لر ایکینزارلریدن ۹۰ فایزی طالبان حاکمیتی و ۱۰ فایزی دولت حاکمیتی آستیده بولگن منطقه لرده ایکیلگن دیب ایتکن. عینی حالده محلی رسمیلر شو ۱۰ فایر ایکینزارلرنی نابود ایتیش ده سعي قیلماقده لر دیب تاکیدلشکن.

اوراق جنابلری، دولت مخالف لری نینگ اکثر مالی منبع لری کوکنار ایکیمی دن تامین لنیشی ني اورته گه قویب شونینگ اوچون دولت کوکنار ایکینزارلرینی نابود ایتیش،قاچاقچیلرنی توتقین ده آلیش و هییروین ایشلب چیقاره یاتکان کارخانه لرنی نابود قیلیش

ایشی ني قول اوستیده آلیب بو کورش ني شدت بیرگن دیب ایتکن.

بدخشان ولایتی پولیس قوماندان لیگی نینگ مخدره ماده لرگه قرشی کورش اداره سي باشلیغی نثاراحمد جهانگیر هرچند بدخشان ده قنچه لیک ییرگه کوکنار ایکیلگنی دن بیران رقم بیرمه گن اما اوتکن شمسی ییلده بو ولایت ده تورت مینگ دن کوکنار ایکینزارلرگه کوکنار  ایکیلگنی ني ایتکن.

باشقه تماندن بدخشان ولایت حاکمیتی ذکریا سودا بو ولایت ده کوکنار ایکیمی اوتکن ییل گه قرگنده کوزگه کورنرلیچه کمیگنی ني تاکیدلب محلی اداره طالبان نظارتي آستیده بولگن منطقه لرده هم کوکنار ایکینزارلرینی نابود ایتیش ده وظیفه دار ایکنی اورغولشدی.

امنیتی مسووللرگه کوره دهقانلر اوتکن ییلی قریب تورت مینگ هکتار دن کوکنار محصولی ني قولگه کیریتیلر. جاري ییلده هم کورینیشی دن بو ولایت دهقانلری کوکنار ایککن ایکینزارلر ۹۰ فایزی دن محصول آلیشلری کوتیلماقده.