بدخشان ولايتي معارف اداره سي ملازملري، حكومت تمانيدن دولت ملازملري آيدليك تينگ بوليشي لايحه سي عملي بولمگني گه قرشي اعتراضلي يغين اوتكزديلر.

اعتراضچيلر بوكون توشدن آلدين ( سه شنبه ١١ قوس) بدخشان ولايتي معارف اداره سي مقابليده توپلنيب بو اعتراضلي نمايش ده دولت ملازملري آي ليك لري اجرا ايتيليشي ده  عدالت رعايه ايتيليشي ني طلب ايتيب تنخواه لرني تينگ لشتيريش لايحه سي تيزراق عملي بوليشي ني طلب ايتيلر.

اعتراضچيلردن بيري احمد الله شيرزاد، حكومت هرچند ايككي ييل آلدين آي ليك لر اوزگريشي لايحه سيني تصديقلشدي اما حاضرگه قدر بو لايحه برچه دولتي اداره لرده توليق عملي بولمگن ديدي. اونگه كوره بيشينچي، آلتينچي ، يتينچي و سكيزينچي بست لردن تنخواه اوله را قولگه كيرته ياتكان آي ليكلر اوته آز دير و كونده ليك روزغارلريني تامينلشده كفايه ايتميدي.

بو اعتراضچيلر حكومت و مسوول اداره لردن دولتي ملازملر آي ليك لري تينگ بوليش لايحه سيني عمل ده تطبيق ايتيليشي لازم بولگني ني طلب ايتكنلر. اعتراضچيلرمركزي حكومت دن جدي تنقيدلب ماليه وزيرليگي سليقه اي طرزده اوزي ايسته گن اداره لرده بو لايحه ني عملي قيلگن ديب اما كوپ ايشلي بولگن معارف اداره لريده اوني تطبيق ايتمگن ديب تاكيدلشكنلر.

يوزلب كيشي دن عبارت بولگن بو اعتراضچي لر بو يغين سونگي ده بير قرار صادر ايتيب اگر بو لايحه تيزليك ده تطبيق ايتيلمسه و بو اداره ملازملري اوندن بهره سبز قالسه بدخشان ولايتي معارف اداره سي دروازه سيني ياپيش دن آگاهلنتيرگن لر.

ماليه وزيرليگي قريب ايككي ييل آلدين دولتي ملازم ار آي ليك و تنخواه اريني تينگلشتيريش لايحه سيني كابينه يغيني گه تقديم ايتي. نهايت ده بو لايحه كابينه تمانيدن تصديق لندي و ماليه وزيرليگي اداراي اصلاحات كميسيوني گه بو لايحه تطبيق ايتيش ده وظيفه بيردي. بو لايحه دن اساسي مقصد دولت ملازملري تنخواه لريني تينگلشتيريش، بيريگه تينگ سيستملرني اورتدن كيتقزيش، ايشبلرمان، متخصص و مسلكي ملازلرني جذب ايتيش و پس رتبه لي ملازملرني قشاقليك و كمبغلليك دن قوتقريش بولگن.

اما حاضر ايسه بو لايحه تصديق لنگني دن ايككي ييل اوتر، دولت ملازملري ماليه وزيرليگي گه تيگيشلي نيچه اداره دن اوزگه باشقه هيچ بير دولتي ارگان و اداره لرده بو لايحه تطبيق ايتيلمگن ديب تاكيدلشماقده لر.