بدخشان ولایتی امنیتی مسووللری بو ولایت ده بیش کیشی دن عبارت بولگن ناقانونی قوراللی بیرگروه نی توتقین ده آلگنی دن خبر بیریب بو گروه نیچه جنایی قضیه ده دخلدار ایکنی نی ایتکن.
بدخشان ولایتی پولیس سوزچیسی ثناالله روحانی بو قوراللی گروه باشلیغی قربان ناملی شخص بولگنی نی ایتیب بو بیش کیشی لیک گروه بوکون ( سه شنبه ۲۸ ثور) ایرته لب بدخشان ولایتی ارگو تومنی گه تیگیشلی بولگن « قره کمر» قشلاقی دن قولگه آلیگنی دن خبر بیردی.
روحانی جنابلریگه کوره بو گروه نیچه قتل، اوغیرلیک، باجگیرلیک و محل یشوچی لری آزار واذیت ده قولی بارلیگی نی ایتکن. حاضرچه پولیس قماقحانه سیده سقلنه یاتکان بو شخص لر نزدیدن تورت میل کلاشینکوف پولیس قولیگه توشکن.
ارگو تومنی بدخشان ولایتی نینگ ناتینچ تومنلریدن بیری بولیب بو ولایت مرکزی فیض آباد شهری یقینیده جایلشکن. طالبان جنگچی لری بو تومن نینگ ایریم حدودلریده نظارت قیلماقده لر و بو تومن ده ناقانونی قوراللی شخص لر حضوری هم انده سنده قوراللی لرارا قانلی توقنشولرگه صحنه بولیب کیلگن.