بغلان ولايتي ده طالبان هجوملري آرتيب باريشي آرتيدن بو ولايت ده خيزش مردمي قوتلر باشليغ ليگي طالبان گه قرشي كورش و طالبان جغرافياي سي كينگيشي آلديني آليش اوچون مردمي قوتلرني جذب ايتيش ده باشلگن.
بغلان پوليسي سوزچيسي احمدجاويد بشارت بوكون( شنبه ١٨ ثور) ديدي بغلان ولايتي يوزلب يشوچيلري و كوپلب خيزش مردمي قوماندان لري امتيتي قوتلردن حمايت ايتيش اوچون تيارگرليكلريني اعلان ايتكنلر.
بشارت جنابلري علاوه ايتي محلي قوماندانلر طالبان جنگچي هجوملري آلديني آليش اوچون اهالي ني جذب ايتيش ني باشلب طالبان هجوملريني دفع ايتكندن سونگ طالبان نظارتي آستيده بولگن منطقه لرني تصرف ايتيش ني اوزيگه مقصد قيلگن.
خيزش مردمي كوچلري قوماندانلري هم طالبان گه قرشي كورش و امنيتي قوتلردن حمايت ايتيش اوچون بيزني توله تيارگرليگي ميز بارديب اعلان ايتكنلر.
طالبان جنگچيلري بير هفته دن بويان بغلان ولايتي مركزي و مهم منطقه لريگه قرشي هجوملريني كوپيتيرگن. بومدت ده بركه تومني دن علاوه بغلان ايسكي شهري نينگ ايريم قسملريني طالبان تصرف ايتكن.
اما امنيتي مسووللر ملي اردونينگ بردم و تازه نفس كوچلري محل گه يتيب بارگني دن خبر بيريب و قولدن كيتكن منطقه لرني قيته تصرف ايتيش عملياتي يقين كيله جكده باشلنه دي ديب ايتكنلر.