ملی اردونی مملکت شمالیده‌گی مقاملریگه کوره امنیتی قوتلر طالبان جنگچی لرینی بغلان ینگی شهریگه قرشی هجوملرنی دفع ایتیب بوگروه گه آغیر تلفات یتکزگن.
مملکت شمالیده کوماندو لواسی قوماندانی صفی الله محمدی دیدی طالبان اوتکن کیچه ( دونشبه ۲۷ ثور) بغلان شهری ایریم ساحه لریگه قرشی هجوم اویشتیردیلر اما بو هجوم دفع ایتیلیب بوگروه آعیر تلفات کوریب منطقه نی ترک ایتکن.
محمدی جنابلری ایککی تمان ارا یوز بیرگن توقنشو ده طالبان نینگ ۴۰ جنگچی سی اولدیریلگنی نی تاکیدلب عینی حالده کندز ـ بغلان شاه یولی حدودیده موجود بولگن امنیتی تهدیدلرهم بوتکل برطرف ایتیلگن دیدی.
بو امنیتی مقام علاوه ایتی کندز ـ بغلان شاه یولی شو حاضر ترافیک یوزیده آچیق دیر و بو شاه یول نینگ باشقه حدودلرینی هم جنگچی لردن تازه‌لش اوچون عملیات و سعی وحرکت لر دوام ایتماقده.
مملکت شمالیده کوماندو قوتلری قوماندانی ، طالبان جنگچی لری بو شاه یول نینگ ایریم حدودلریده ماین جایلشتیرگنی نی اورته گه قویب شو سبب دن امنیتی قوتلر عادی اهالی تلفاتی آلدینی آلیش اوچون احتیاط بیلن عملیاتلرینی دوام ایترماقده لر دیدی.
طالبان گروهی حاضرگه قدر بوباره بیران نرسه ایتمگن.
طالبان ایککی دن بیری کندز ولایتی ایریم حدودلریده هجوملرینی شدت بیرگندی. هیت کونلریده اعلان ایتیلگن آتش کیسیم دن سونگ طالبان جنگچی لری بغلان نینگ ینگی شهری گه قرشی هجوملرنی شدت بیرگندی اما بو هجوملر حاضرگه قدر امنیتی قوتلر تمانیدن دفع ایتیلگنی نی امنیتی قوتلر مسووللری تاکیدلشکن.