جوزجان ولايتي محلي رسميلري، هرييلي بوغداي محصولاتي ني اوريش چاغيده امنيتي قوتلر و طالبان جنگچي لري ارا اورش ميدانلري هم ايسيغ بوليشي دن خبر بيرماقده لر. رسميلرگه كوره هرييلي بو اوروشلر جريانيده مينگلبچه ايكنزارلر اوت آليب نابود بوله دي و اگر اوروش بولمسه دهقانلر حاصل آلگن بوغداي لري عشرني طالبان گه بيريش لري شرط.

آقچه تومن حاكمي غلام سخي سبحاني نشانه خبر آژانسي بيلن صحبت ده ديدي طالبان جنگچي لري هجوملري سبب آقچه تومني اطرافيده اهالي نينگ اونلب هكتار بوغداي ايكنزارلري اوت گه يانگن. اوني معلوم قيليشيچه هرييلي بوغداي اوريليشي موسوميده امنيتي قوتلر و طالبان ارا اوروش لر شدت آله دي و دولت مخالف لري بو موسوم ده اورش ني باج آليش مقصديده باشلي ديلر.سبحاني جنابلريگه كوره آقچه تومنيده سونگي كونلرده يوزبيرگن توقنشولرده بيرقطار دهقان لر بيرييل ليك زحمتلري محصولي ني قولدن بيرديلر.

آقچه تومن حاكمي ني ايتيشچه دهقانلر طالبان قورقيشي دن تيگيشلي ارگانلرگه شكايت قيله آلميديلر و شو سبب دن قنچه ايكنزارلر نابود بولگني دن انيق رقم بيزگه يوق.

آقچه تومني ايسكي شهري يشوچي سي و اوز اسميني ايتيش دن واركيچگن دهقانلردن بيري ديدي طالبان گروهي دهقانلرگه تيزراق حاصلات لريني يغيب آليش دن خبر بيرگن جونكه بو دهقان گه كوره طالبان نيچه مدت دن سونگ اوروشني بو منطقه دن شدت بيرماقچي.بو دهقان علاوه ايتي طالبان نظارتي آستيده يشه ياتكان منطقه دهقانلري حاصلات لري نينگ اون دن بير حصه سيني طالبان گه عشر وذكات بيريش گه مجبورديرلر.

عيني حالده جوزجان ولايتي امنيه قومانداني عبدالواحد وجدان ديدي هرييلي شو موسوم ده اوروش لرشدت آليشي و طالبان هجوملري كوپيشي سببي دهقانلر حاصلات دن طالبان ني عشر وذكات آليشي دير. وجدان جنابلريگه كوره امنيتي قوتلر، طالبان تمانيدن عشر وذكات يغيشني الديني اليش ده سعي قيله دي و شونينگ اوچون طالبان امنيتي قوتلر پوسته لريگه هجوملريني كوپيتيريب مردم دن باج آله ديلر. جوزجان پوليس باشليغي گه كوره طالبان هجوملري سبب مردم و دهقانلرگه كتته خساره ار يتكزيله دي چونكه كوپلب اينكزارلري اوت آليب نابود بوله دي.