بير مثبي واقعه رويخط ده آليندي؛ بدخشان نينگ قرنطين لايحه سي كابل گه جونتيلدي
neshananews
30 March 2020بدخشان ده بير مثبي واقعه رويخط ده آلينگني دن سونگ، بو ولايت محلي رسميلري بو ولايت ني قرنطين قيليش لايحه سيني تيارلب تصديق اوچون مركزكه جونتكنلر.
بدخشان رسميلري بو ولايت ده باردي كيلدي اوچون ينگي قيودات ني هم يولگه قويگن لر.
بدخشان ولايت حاكمي سوزچي سي نيك محمد نظري دوشنبه ١١ حمل كوني نشانه خبر آژانسي بيلن صحبت ده بو ولايت كرونا ويروسي ني يوقتيرگن ايلك شخص رويخط ده آلينگني دن سونگ، محلي حكومت مسوللري بير فوق العاده يغين ده بدخشان قرنطين يكوني لايحه سي ني تصديق اوچون كابل گه جونتكن لر ديب خبر بيردي.
بو لايحه گه كوره، برچه دولتي اداره لر كيله سي كونلرده تعطيل بوليب آذوقه ساتوچي دوكانلردن باشقه سي ياپيليشي نظر گه آلينگن.
بدخشان حاكمي سوزچي سي ديدي مركزي حكومت تمانيدن بو لايحه تصديق لنيشي گه چه، محلي رسميلرضرورت بولمگن يغين لر آلديني آليش اوچون كيركلي ايشلرني عملي قيلگن لر.
اونگه كوره حكومت بو ايشلرني عملي قيليش ده امنيتي قوتلر فايده لنگن.
بدخشان محي رسميلري بو ولايت قرنطين بوليشي لايحه سيني اونداي بير حالده مركزگه جونتكن كه بوندن بير كون آلدين بيرينچي مثبت واقعه بو ولايت ده ثبت بولگن.
عيني دمده بدخشان عامه ساغليك اداره سي مسوللري موجود وضعيت دن خواتير بيلديريب كرونا ويروسي ييرليشي خطريدن مردم نينگ بي پروا ليگي اوچون بو ويروس ني يوقتيرگن لر ساني كوپيشي ممكن ديديلر.
بدخشان عامه ساغليك اداره سي ريسي نورخاوري ديدي:”مردم بيزني توصيه و آگاهلنتيريش لري ميزگه عمل قيلميديلر و شو موضوع سبب بيز باشقه بير قطار اداره لر همكارليكي بيلن جدي دستورني قول اوستيگه آلديك.” اونگه كوره بدخشان عامه ساغليك اداره سي نيچه شبهه لي واقعه سمپل لريني تيكشيريش اوچون كابل گه جونتكن.خاوري جنابلري علاوه ايتي حاضرگه قدر بو نمونه لر نتيجه بدخشان گه يتيب كيلمگن. بدخشان عامه ساغليك اداره سي بدخشان نينگ قرنطين گه آليش لايحه سي تصديق لنيب و عملي بوليشي بيلن كرونا ويروسي ييرليشي آلدي آلينيش گه اميدوار دير.
باشقه تماندن بدخشان مدني فعاللري محلي حكومت كم كارليگي دن تنقيدلب ديديلرمردم نينگ گوجوم منطقه لرده باردي كيلدي لري آلدي آلينمسه و ضرور بولمگن دوكانلر ياپيلمسه مردم اساسا اخلاقي توصيه لرگه عمل قيلميديلر.
مدني فعاللردن بيري عبدالباعث گه كوره ايران دن مهاجرلرني كوپ سانده قيتيب كيليشي و مردم ني ساغليك ني سخلش توصيه لرگه اعتناسيزليگي سبب بو ولايت ده كرونا ويروسي ييرليشي خطريني كوپيتيرگن.
اونگه كوره حاضرچه برچه مراسملر خصوصا” توي لر عادي شكليده اوتكزيلماقده و اگر بوتوغريده جدي و ايجابي حركت دولت تمانيدن عملي بولمسه مردم ارا كرونا ويروسي ييرليشي حتمي دير.
باشقه تماندن بدخشان ولايت حاكمي سوزچي سي نيك محمد نظري ايشانچ بيلديره دي كه ضرور بولمگن يغين لر آلديني آليش لايحه سي كوريب چيقيلگن و سه سنبه ١٢ حمل كونيدن عملي بوليب عمومي مراسم لر آلدي هم آلينه دي ديدي.
نظري جنابلري ني ايتيشيچه بدخشان ولايت حاكمي وظيفه لنتيريلگن كميته گه، مركز تمانيدن قرنطين لايحه سي تصديق لنگونچه عمومي جاي لر جمله دن هوتل لر،حمام لر، توي تالارلري و ضروري بولمگن ماركيت لرني ياپيب و كرونا ويروسي ييرليشي گه سبب بوله ياتكان برچه يغين لر آلدي آلينشي ني هدايت بيرگن.
نظري جنابلري عيني دمده ساغليك ني سخلش كميته گه امنيتي قوتلر همكارليگي بيلن برچه عمومي محله لرني دوا سپيش گه بويروغ بيرگن ديدي.
بدخشان محلي حكومتي مملكت ده كرونا ويروسي تهديدي تاپيلگن ايلك كونلرده كروناگه قرشي كورش كميته سي ني ايجاد ايتكندي. بو كميته مردم گه معلومات يتكزيب ايران دن تازه قيتيب كيلگن كيشي لرني قرنطين قيليش و بازار ده نرخ لر كوتاريليشي آلديني آليش و عمومي يغين لر الديني آليش اوچون وظيفه لنتيريلگندي.
بدخشان محلي رسميلري برچه تومنلرگه مكتوب يوللب ايران دن تازه قيتيب كيلگن كيشي لرني اوي دن چيق مسليك گه توصيه قيليشي ني بويرگن.
