تازه بیر حربی عملیات دن قیتیب کیلدی.سیماسیده اولتیرگن چنگ وغبار، اوروش میدانیده قیینت کیچه و کندوزلرنی اوتکزگنی دن دلالت بیره‌دی. توش اوقاتی پیتیده سنگرداش لری بیلن اوروش میدانی و عملیات جریانیده باشدن کیچیرگن حادثه لردن حکایه ایته دی.

اسمی محمد نماز. تخارولایتی نینگ دشت قلعه تومنی یشوچی سی دیر. ملی اردونینگ بو عسکری ۱۲ ییل دن بیری تخار، کندزو بدخشان ولایت لریده ملی اردو قوتلری صفی ده خذمت قیلیب کیلگن من دیدی: ” مین ۱۲ ییل آلدین ملی اردو صفی گه قوشیلدیم. اوز رغبتم بیلن کیلدیم و مقصدم اولکه ام گه خذمت کورستیش دیر. ۸ ییل تخار و کندز ده و ۴ ییل هم بدخشان ده خذمت قلیب کیلماقده من”.
اوروش میدان لریده اونی تجربه و بجرگن ایشلریدن سوره‌دیم، او جواب بیردی:” تخار، کندز و بدخشان ولایت لریده طالبان گروهی گه قرشی، خوفسیزلیک و امنیت نی تامین لش و افغانستان خلقی یاولرینی نابود قلیش اوچون برچه قانلی اوروشلرده قتنشکن من”.

نمازگه کوره اینگ اساسی مقصدی افغانستان خلقی گه خذمت کورستیش، امنیت نی تامین لش، و تینچلیک گه قول تاپیش دیر و بو یولده جانی فدا قلیش ده هم حاضرایکنی نی اورغولیدی: “کندز ولایتی نینگ چهاردره و دشت ارچی اولسوال لیک لرده یولگه قویلگن برچه حربی عملیات لرده قتنشیب و حاضرهم شندای عملیات لرده اشتراک ایتماقده من، بیرقطار دوستلریم ملی اردو صف لریگه قوشیلگنی دن خبر بولیب مین هم بو قوتلر صفی گه قوشیلیش گه رغبت تاپیب اوز اولکه ام خذمت قلیش نی افضل کوردیم”.

تینچلیک مذاکره و سوزلشولری اوج آلگن وقت ده، اولکه سیده تینچلیک برقرار ایتیلیشی اوچون امیدی کتته بولگن ملی اردونینگ بوعسکری، اگر دولت گه قرشی چیققن قوراللی مخالف لر افغانستان خلقی نینگ تینچلیک سیور آوازیگه مثبی جواب بیرمه‌سه لر،اولرنینگ نابود قلیش اوچون توله تیارگرلیک گه ایگه ایکنی نی تاکیدلب حتی اوز قانی بهاسیده بو اولکه دن مدافعه ایته من دیدی.
محمد نماز هرچند که ملی اردو صفی گه ۱۲ ییل کورستکن خذمتلریدن کوپ عبرت ودرس الگنی دن حکایه ایته دی اما او هلی هم دینی تعلیمات دوره لر و شونینگ دیک حربی عملیات لراوچون مسلکی تعلیمات کسب ایتیش دن واز کیچمیدی.

محمد نماز، اوز وقتی بیرقسمی نی حربی تعلیمات کسب ایتیش ده و طالبان گه قرشی اوروش سنگرلریده و شونینگ دیک حربی قرارگاه گه قیتیب کیلگنی پیتیده باشقه سنگرداش لری بیلن بیرگه حربی تعلیمات ده صرف لشیدن سوز یورته‌دی.

او، دولت ، ملی اردو عسکرلریگه مناسب اذوق اوقات و یخشی آی لیک بیریشی نی اورته گه قویب اما وطنی دن مدافعه ایتیش حسیاتی سبب ایریم وقت لر حتی ایککی آی هم عایله سینی یقین دن کوریش گه امکان تاپمگنی دن معلومات بیردی.

عایله سی احوالی دن کوپراق تلفن آرقلی خبر اله‌یاتگان محمد نماز” ایککی آی دن بیری اویم گه بارمگن من و فقط تلفن آرقلی عایله ام احوالی نی سوری من و دایم تورمیش اورتاقیم ، فرزندم و باشقه خویش وتبارلریم ساغلیک لریدن ایشانچ حاصل قیله من. اوچ آی دوام ایته یاتکان هر بیر سیکل (دوره)
دن سونگ اون کون دم آلیش اوچون تعطیل گه چیقه میز و اوی میزگه کیته میز، عایله میزاحتیاجلیک لرینی تامین لشکن دن سونگ وظیفه میز اوستیگه قیته میز. بدخشان ده‌گی ملی اردونینگ ایککنچی لوا سیده کندز، تخار، بلخ، بدخشان،کابل ، کندهار و باشقه ولایتلردن عسکرلر بیربیرلری بیلن یشیدیلر،بولردن بیر قطاری حربی تعلیمات گه اشتراک ایته‌دیلر و بیرقنچه لری هم بدخشان نینگ ناتیچ بولگن حدودلریده خذمت کورستیدلر”.

محمد نماز، ملی اردو صفی ده ۱۲ ییل دن بیری خذمت قلیب کیلیشی دن افغانستان نینگ تورلی ولایت لریدن کوپلب دوست تاپکن و اولر بیلن اوته صمیمی من دیدی .
نمازنی معلوم قیلیشیچه افغانستان نینگ تورلی قوم لریگه تیگیش لی یاش و یگیت لر ملی اردونینگ ایککنچی لواسیده اونی بیلن تانیش و دوست بولگن و برچه لری بیربیرلری بیلن همکار بولیب اولر آره‌سیده‌گی صمیمت سبب ملی اردو، ملی بیرلیک وبیردملیک سیمانی تصویرلشکن.

نماز همیشه دوست لریدن وظیفه جریانی و حتی دم آلیش کونلریده خبرآلیشی نی ایتیب اولرآره سیده‌گی صمیمیت سبب حتی بیربیرلری بیلن عایلوی باردی کیلدی لری بولگنی نی ایتیب و بو وضعیت ملی اردو قوت لرینی بدخشان دن توتیب قندهارگه چه بیربیریگه باغله‌گن دیدی.

اوتاکیدلشدی:” بوییرده بیزلر آره میزده پشتون، تاجیک، اوزبیک ، هزاره و باشقه قوم لردن یاش لر بار و بو موضوع بیزلرنینگ آره میزده هیچقندای معما گه سبب بولمگن؛ چونکه برچه میز بیر قوشمه مقصد اوچون کورشه میز و بیزلر آره میزده هر حالت ده محبت و صمیمیت بار.
ملی اردونینگ بو عسکری ۱۲ ییل مدتی ده کوپلب شیرین و اچیغ خاطره لری گه ایگه اما اونی اینگ مهم آرزو و ایستگی افغانستان ده تینچلیک و اسایشته لیک اورنتیلیشی دیر.