کوه نوردی

تاغ گيزوچي قيزلر ايككينچي مراتبه ” شاه فولادي” تاغيني فتح قيلديلر

neshananews

16 May 2021

تاغ گيزوچي قيزلر ايككينچي بار باميان ولايتي ده جايلشكن ” شاه فولادي” تاغيني فتح قيليش ده موفق بولگنلر. بو تاغ ني ديگيز سطحي دن ٥ مينگ و ١٤٠ متر مسافه سي بار. تاغ گيزوچي سكيز قيز ايككي كيچه و كندوز دن سونگ بو تاغ چوقي سيگه يتيب بارگنلر. شاه فولادي چوقي سي بابا سلسله تاغلري نينگ اينگ بلند و مشهور تاغي دير كه باميان ولايتي ده جايلشكن.
بو گروه اعضالريدن بيري مباركه محمدي نشانه خبر آژانسي بيلن صحبت ده ديدي بو گروه عاقله هاشمي و فاطمه سلطاني هدايتي و همكارليگي بيلن هيت نينگ بيرينچي كونيده شاه فولادي تاغي چوقي سيده يتيب بارگني ني ايتي.
مباركه خانم ١٣٩٥ ييل دن بيري تاغ گيزيش ده يوز كيلتيرگن. او تاغ گيزيش ني بير سرگرمي اوله راق تنلب و بوندن آلدين پنجشير ولايتي تاغلريني گيزگن.
خانم محمدي اوزي و گروهي ني بو ايش دن مقصدلري باشقه قيزلرني بو سپورت گه ترغيب ايتيش بولگني ني تاكيدلشدي. مباركه محمديگه كوره بيزقيز تمانيدن تاغ ني فتح قيليشي در حقيقت افغانستان عيال و قيزلريني اجتماعي قيينتچليك لرگه قرشي غلبه سي دير.خانم محمدي علاوه ايتي افغانستان عيال و قيزلري اوروش و قان توكيليش دن كليب چيققن قيغو و دردلريني اونوتيش اوچون موفقيت و بونداي يوتوقلرگه ايرشيش گه ضرورتلري بار. اوني تاكيدلشيشيچه تروريستي هجوملر قيزلرني آرقه گه قيتيش و يا سيس سيزليك لريگه سبب بوله آلميدي.
بو تاغ گيزوچي قيز، گروهي ميز تاغ لر چوقي سيني فتح ايتيش بيلن زوروانليك و دهشتگرچيليك گه قرشي كورشه ديلر ديدي. اونگه كوره موفقيت جنگ ده ايمس بلكه تاغ چوقي لريني فتح ايتيش ده دير. بانو محمدي، بيزنينگ گروهي ميز ايلك بار شاه فولادي چوقي سيني اوني اصلي يوليدن يعني شاه فولادي دره سي آرقلي فتح ايكن ميز ديدي.
بوندن آلدين باشقه ايككي عيال ميدان وردك يوليدن شاه فولادي چوقي سيگه يتيب بارگن ديلر. خانم مباركه علاوه ايتي بو موفقيت بيزنينگ تاغلرني گيزيش ده ايلك يوتوقي ميز دير و بيز ” اورست” تاغي ني فتح ايتيش گه چه سعي و حركت ميزني دوام ايتيره ميز ديدي. نحمدي خانم بو موفقيت ني كسب ايتيش ده اوز شخصي امكانيتلريدن فايده لنگني دن خبر ببردي.
عيني حالده باميان ولايت حاكمي سوزچيسي لطيف عظيمي، تاغ گيزوچي دو قيزلر هيت نينگ بيرينچي كوني توش دن كين شاه فولادي تاغي چوقي سيگه يتيب بارگنلريني تصديق لشدي. عظيمي جنابلري دوندن آلدين نازيمه خيرزاد و تمنا جهان ناملي ايككي قيز بو چوقي ني فتح قيلگنديلر ديب علاوه ايتي.باميان ولايت حاكمي سوزچيسي، محلي حكومت ايچكي و تشقي، عيال و ايركك سياحتچي و تاغ گيزوچيلر بيلن امنيت تامين لنيشي بويچه دايم همكارلبك قيلگني دن تاكيدلشدي. بوندن آلدين اوتكن ييلي عاقله هاشمي، فاطمه سلطاني و طاهره سلطاني ناملي قيزلر ايلك بار افغانستان تاريخي ده بير توقيزكيشي ليك گروه دايرسيده بدخشان نينگ نوشتخ تاغي چوقي سيني فتح ايتيش ده موفق بولگنديلر. نوشاخ هندوكش تاغلري نينگ ايككينچي چوقي سي دير كه دينگيز سطحي دن ٧ مينگ و ٤٩٢ متر مسافه سي بار.