تخار-880x550

تخار سياسي مصاحت لر قرباني؛ غني و عبدالله ارا ينگي كيليشو بو ولايت وضعيتي ني يخشي لشتيره مي؟

neshananews

03 June 2020

مملكت شمالشرقيده جايلشكن تخار، ١٣٩٣ ييل دن بويان سياسي مصلحت لر آرتيدن محلي رقابت لر، انتقام آليش، قانلي منازعه و توقنشولرگه صحنه بوليب كيلگن ولايت لردن بيريگه ايلنگن. بير پيت ده مقاومت قرارگاهي و طالبان گه قرشي اوروش و مقاومت شو ولايت ده رهبرليك بوله ياتكان تخار، حاضرچه محلي منازعه لر و ناقانوني قوراللي گروه لر كوپيشي سبب بو ولايت نينگ ايريم قسم لري طالبان قرار گاهي گه ايلنگن.بو ولايتده هر كوني طالبان سنگرلري كوپيگني دن علاوه، ناقانوني قوراللي گروه لر و مخدره ماده لر قاچاقچي لري حضوري باعث قانلي اوروشلر و جنايي جرملر كوپيشيگه صحنه بوليب كيلماقده.

ناقانوني قوراللي گروه لر بو ولايت نينگ اكثر اولسوال ليك لري خصوصا كوكچه قيرغاغيده جايلشكن تومن لرده محلي پوليس و خيزيش مردمي قوتلر دايره سيده طالبان گه قرشي كورش بهانه سي بيلن محلي تارتيشو و كيليشموچيليك لر تندوري ني ايسيغ سخله گن. بو قوراللي لر ارا توقنشولر سبب حاضرگه قدر عادي و گناه سيز اهالي دن كوپلب كيشي لر قربان بوليب جراحتلنگن لر.

تخار ولايتيده محلي تارتيشولر، مخدره ماده لر قاچاقي، آلتين كانلرني ايگللش اوستيده رقابتلر و سياسي رقابت لردن ايلديز آلگن. تخاريشوچيلريگه كوره حكومت تالقان شهريدن باشقه هيچ بيرتومن ده يوزده يوز حاكميتي يوق و ناقانوني قوراللي لر قانون گه خلاف، صحرايي محكمه لر اوتكزيب محلي كيليشموچيليك لرني اوزلري ايسته گن طريقه لر بيلن حل ايته ديلر.

اهالي ني ادعا قيليشيچه هر تومن ده ناقانوني قوراللي گروه لر ٧٠٠ دن ١٠٠٠ قوراللي بيلن ايجاد بولگن و بو وضعيت دوام ايتيشي بو ولايت ده دولت حاكميتي يكونليشي اوچون خواتيرلرني ايجاددقيلگن. اوز اسمي ني ايتيش دن وازكيچگن تالقان يشوچيلريدن بيري ديدي:”هرتومن ده سياسي جريان لر و حكومت باشليغ لريگه تيكيشلي بولگن قوراللي گروه لر ايجاد بولگن و اگر بو قوراللي گروه لر اوز باشيمچه ليگي آلدي آلينمسه كتته كان بحران مملكت ده يوز بيريشي ممكن.” اونگه كوره بو ولايت ده اجتماعي اورنگه ايگه بولگن اسلامي حزب، اسلامي جمعيت و جنبش حزبي كبي بيرقطار قدرتلي حزب لر اوزلريگه خاص قوراللي گروه لرگه ايگه ديرلر.حاضرچه اوروش جنايت لري و ناقانوني قوراللي گروه لر تمانيدن بجيريله ياتكان جنايي جرملر، مركزي حكومت تمانيدن تيكشيريليشي قيينت و ايريم حاللرده ناممكن بولگن.

تخارولايت كينگاشي اعضالري هم كون اوتيشي بيلن كوپيب باره ياتكان توقنشو، تارتيشولر ومحلي منازعه لردن تشويش بيلديريب ديديلر اگر حكومت ناقانوني قوراللي گروه لر فعاليتي ني توختتيش اوچون بو ولايت ده ايجابي چاره تدبير كورمسه، بو قوراللي گروه لرنينگ انتقام آليش و اوزباشيمچه حركت لري بيلن،بو ولايت ده يوزگه كيلگن بحران ني باشقريش مركزي حكومت كنترولي دن چيقيش ممكن دير. تخارولايت كينگاشي اعضاسي عصمت قرباني ديدي ناقانوني قوراللي گروه لر حضوري و حاكميتي، كوكچه قرغاغيده جايلشكن تومنلرني مخدره ماده لر قاچاقي نينگ ايشانچلي يولي  و بو ولايت نينگ باشقه بير قطار تومنلريني قانلي زوروانليك و انتقام آليش ميدانيگه ايلنتيرگن.

تخارولايت كينگاشي نينك بو اعضاسيگه كوره ناقانوني قوراللي گروه لر ايككي سيلاوده معلوم تكت لردن حمايت اعلان ايتيلر و سياسي جريانلردن اولرنينگ طرفدارليگي سبب اولر مملكت نينگ يوقاري درجه لي رهبرلري حمايتي گه ايگه ديرلر.

سياسي كوزتوچيلرگه كوره ٢٠١٤ ييلي سيلاوي دن يوزگه چيققن تارتيشو و جنجاللر و جمهورريسليك سيلاوي نينگ ايككي ايلغار نامزدي ارا ملي بيرليك حكومتي ايجاد بوليشي، بو سياسي جريانلر ارا مسافه ني اوزيتيردي و بو ايككي سياسي جناح گه تيگيشلي بولگن قوراللي گروه ارا محلي تارتيشو و كيليشموچيليك لرگه زمينه يرتدي. ٢٠١٤ ييلي سيلاوي دن سونگ سياسي قدرت عبدالله عبدالله و اشرف غني ارا تقسيم بولگني آرتيدن تخارولايتي سياسي حاكميتي عبدالله عبدالله گه تعلق تاپدي و محلي مسوللرني ايشگه آليش ريجه سي سياسي مصلحت گه اساس لنيب و محلي تارتيشولر و منازعه لرگه زمينه يرتدي. سياسي قدرت گه شريك بولگن تمان گه بيريلگن امتيازلر سبب بولدي كه قدرت دن محروم قالگن تمان محلي حكومت مديريت و اجرااتي دن باش تارتيب و  كيليشموچيليكلر اوتي النگه لدي.

تخار ولايتي مدني فعاللري ديديلر بو ولايت ده دولت و قانون حاكميتي ضعيفليگي سبب مردم اوتميش ده گي قتل لردن انتقام آليش اوچون ناقانوني قوراللي گروه لر قوماندان لري صفيگه قوشيلديلر و قتل و انتقام آليش زنجيري اوزيتيلريلدي. اولرگه كوره مركزي حكومت حاضرگه قدر بو محلي رقابت و تارتيشولر الديني آليش ده هيچقنداي منتظم دستور و برنامه گه ايگه ايمس دير.مركزي حكومت اونلبچه گناه سيز اهالي  جاني ني آلگن تخارده گي كيليشموچيليك و منازعه لرني حل ايتيش ده يالغيز  مصلحت و اورته گه توشيشده كفايه ايتكن اما بو ايش اهالي نينگ جدي تنقيديگه دوچ كيلگن. تخارولايت كينگاشي اعضاسي عصمت قرباني ديدي جنايتچي لر قانون گه مطابق جزالنتيريليشي كيرك و قانون چنگاليدن اخلاقي توصيه و سياسي مصلحت لر بيلن قاچمسليگي لازم.اونگه كوره حكومت ناتينچليك لر و ناقانوني قوراللي گروه لر فعاليتي ني توختتيشگه حركت قيلمسه، تخارده زورانليك لر ميزاني كون اوتيشي بيلن آرتيب باريشي ممكن ديدي.هرچند تخاريشوچيلري جاري وضعيت ني ٢٠١٤ ييلي ده اوتكزيلگن جمهورريسليك سيلاوي نتيجه سيدن چيقگن سياسي قدرت تقسيم بوليشي دن بيله ديلر و ٢٠١٩ ييلي سيلاوي نتيجه سيده ينگي سياسي كيليشو ارتيدن زورانليك لر كوپيشدن تشويش اظهار ايته ديلر.

هرحالده محمداشرف غني و عبدالله عبدالله ارا ينگي سياسي كيليشويگه اساسا” تخارولايتي سياسي تقيسمات ده ينه هم عبدالله عبدالله گروهي گه تعلق تاپكن و بو تقسيمات دن سونگ بو ولايت ده گي زوروانليك و تارتيشولر كميه مي يا يوق، ناقانوني قوراللي گروه لرگه قرشي كورش ده  و ملي حاكميت و قانون تطبيق ايتيليش ده ينگي حكومت ني جدي عزم و اراده سيگه تيگشلي دير.