تخار محلي رسميلری: طالبان بو ولایت یاشلرینی مجبورن اوروش‌گه جونته‌دی
neshananews
26 July 2021مملکت شِمالیده اوروش اوج آلگنیدن سۉنگ، تخار ولایت نینگ مرکزی تالقان‌دن تشقری برچه تومنلر طالبان نینگ ایلک هجومیده بو گروه نظارتیگه اوتدی .
ولایتده طالبان نینگ اوروش جغرافيه‌سی کېنگینی آرتیدن، خلق نینگ مقاومت کۉرسه‌تیش تۉلقینی‌هم ایجاد بولیب، بوگروه تالقان شهرینی اوز نظارتیگه کیریته‌آلمه‌دی و سۉنگگی بیر آی ایچیده طالبلر نینگ اۉنلب شهرگه قیلگن هجوملری خلق مقاومت کوچلری تامانیدن قَیتریلدی.
تخار ولایتیده‌گی محلي و خوفسیزلیک منبعلری نینگ خبر بېریشیچه، طالبان قوماندانلری یاشلر و اۉسپیرینلرنی جنگچی اوله‌راق مجبورن جلب قیلیش جریانینی کوچه‌یتیرگن.
اولر نینگ سۉزلریگه کۉره، قانوني یاشگه اېتمه‌گن کۉپلب یاشلر و اۉسپیرینلر طالبان باسیمی و تهدیدی آستیده قورال آلیب، اولرنی خوفسیزلیک کوچلریگه قرشی توریش اوچون گروه تامانیدن اوروش‌ني اولگی صفیده جۉنه‌تماقده‌لر.
تخار پولیس قوماندانلیگی سوزچیسی خلیل‌اسیر نینگ ایتیشیچه، حاضرده طالبان‌نینگ شهریگه قرشی اۉنلب هجوملری شکست‌گه اوچره‌گن، طالبلر جنگریلری ولایتدهگی یاشلر و اۉسپیرینلرنی اوروشیش اوچون حربي خدمتگه آلماقده‌لر.
جناب اسیر نینگ سۉزلریگه کۉره، افغانستان قوراللی کوچلری نینگ هوا هجوملریدن سۉنگ تالقان شهری اطرافیده طالبان جنگچیلریگه کتّه تلفاتلر ېتکزیلگن و گروه کېینگی تلفاتلر نینگ آلدینی آلیش اوچون اوروش‌ده ولایتدهگی یاشلردن فایده‌لنماقده.
جناب اسیر نینگ تأکیدلشیچه، یاشلر و اۉسپیرینلردن فایده‌لنیش، شونینگدېک، تینچ اهالیدن قلقان صفتیده فایده‌لنیش “حربي جنایت” اوله‌راق قبول قیلینگن، اما طالبلر اۉز مقصدلریگه اېریشیش اوچون شونده‌ی یۉل توتگن.
محلي منبعلر و طالباندن قۉرقیب اسمینی آشکار قیلیشنی ایسته‌مه‌یدیگن بیر قطار تخار اهالیسی سۉنگگی بیر نېچه کون ایچیده طالبان تامانیدن مجبورن قوراللنگن کۉپلب یاشلر نینگ اوروش جبهه‌لریده خوفسیزلیک کوچلری بیلن جنگده هلاک بۉلگنلیگینی اَیتماقده.
اسمی فاش ایتیلیشی‌نی ایسته‌مگن اشکمش تومنی یشاوچی سی نینگ ایتیشیچه، کېچه ( یکشنبه ۳اسد) جنگ میدانیده طالبلر تامانیدن مجبورن جونتیلگن بیر نچه ییگیتلر اۉلدیریلگن. اونگه کۉره، طالبلر هر کونی آدملرنی خوفسیزلیک کوچلریگه قرشی کوره‌شیش اوچون اۉز فرزندلرینی گروه صفلریگه یوباریش بیلن قۉرقیتماقده.
محلي منبعلرلرگه کوره سۉنگگی بیر آی ایچیده طالبان جنگچیلری تامانیدن باسیب‌آلینگن بیر قطار تومنلرده ، یاشلر طالبان تمانیدن مجبورن اوروش‌میدانیگه جونتیلیشی دوام اېته‌یاتگنی سبب اکثر اهالی طالبلر ظلمیدن قوتولیش اوچون قاچیش حرکتلری نتیجه بېرمه‌گنلیگینی اَیتماقده.
محلي اهالی نینگ ایتیشیچه، کۉپلب جنگلرده و اردو نینگ هوا هجوملریده طالبان جنگریلری آدملر نینگ اویلرینی سنگر توتیب و تینچ اهالیدن اېسه اوروش قلقانی صفتیده ایشله‌تیشه‌دی.
یوزلب عایله‌لر تخار ولایتیدن کابلگه آواره بولیب و شِمالده سۉنگگی پیتلرده اوج آلگن زۉرآورلیک، طالبلر نینگ مجبورلشی و جنگلر نینگ کوچه‌ییب باریشی آرتیدن کېچه و کوندوز کۉپلب قیینچیلیکلرنی باشدن کچیرماقده.
بو آواره‌لرنینگ ایتیشیچه، طالبان جنگچیلری هېچ کیمگه رحم-شفقت قیلمه‌یدیلر، شونینگدېک، برچه دولت و نادولت تشکیلاتلرینی یاپیشدن تشقری، کۉپلب خصوصي کارخانه‌لر ولایتدهگی طالبلر قۉرقووی سببلی یاپیلگن.
کابلده‌گی تخارلیک آواره‌لرنینگ سۉزلریگه کۉره، اولرنینگ حدودلری طالبان جنگریلری قۉلیگه اۉتگنیدن سۉنگ، اولر نینگ بو حدودلرده امان قالیشلری امکانسیز بۉلیب قالگن و اولر اېندی کابلده‌گی آواره‌لر کمپ‌لریده یشه‌ماقده‌لر.
تخار خوفسیزلیک مسووللری نینگ ایتیشیچه، سۉنگگی کونلرده ولایت مرکزی تالقان شهریده اۉنلب طالبلر نینگ هجوملرینی قَیتریش بیلن بیر قطارده، طالبلر موقع‌لریگه اردو تامانیدن قیلینگن هوا‌هجوملر سانی ینه‌ده کوچه‌یگن و گروه جنگچیلری آغیر تلفات‌لرگه دوچ کېلیشگن.
خوفسیزلیک خدمتی خادملری و تخارده‌گی مقاومت کوچلری فکریگه کۉره، خوفسیزلیک کوچلری و مقاومتچیلر هوادن قۉللب-قوّتلنیشی کوچیسه، بو کوچلر ولایت مرکزیگه خوفسیزلیک تهدیدلرینی برطرف ایتیش بیلن، یۉقالگن حدودلرنی طالباندن قیتریب آلیشگه قادر دیرلر.
