كابل غربي نيچه ييل دن بيري قانلي و ويرانگر هجوملرگه گواه دير كه اوني اينگ كوپ ضرر و صدمه سي عادي اهالي خصوصا” عالي اوقويورت طلبه لري، مكتب اوقوچيلري و ياشلرگه يتكن. كورينيشي دن بونداي ريجه لنگن و مذهبي هجوملرگه قرگنده خلق ارا تروريسم اوز قربانلريني فقط بير خاص قوم دن تن آلگني يقال معلوم دير. افغانستان دولتي و طالبان گروهي اوز نوبتلريده بو هجوملرني قاره لشكنلر. اما اساسي سوال بوتوغريده بو دير كه بونداي قانلي و انسانيت گه ضد بولگن بونداي هجوملرني اصلي عاملي كيم دير؟ كيملر فرزندلريني قولدن بيرگن و قيغوگه باتكن آته و آنه لر سواللريگه جواب بيره دي؟ بيز كيملردن سوره آله ميز و كيم گه پناه كيلتيره آله ميز؟ رسمي معلوماتلرگه كوره ثور آي ١٨ نچي كونيده كابل غربيده يوز بيرگن قانلي پارتلش ده اينگ آز ٥٠ كيشي اوزجانلريني قولدن بيريب و ١٠٠ كيشي هم جراحتلنگن.
بو سوالگه دولت و امنيت دايره سيگه
جواب تاپيش ممكن. بير عمومي سيلاو دن كيليب چيققن دموكراتيك دولت لرنينگ اينگ كاتته وظيفه سي مردم نينگ جان و ماللري خوفسيزليگي ني تامين لش دير.تروريستي گروه لر فعاليتي گه زمينه يرتيلگن اولكه لرده خوفسيزليك ني تامين لش دولتلرنينگ اصلي وظيفه سي دير. شونينگ اوچون بيرينچي دن افغانستان دولتي دن سورش كيرك؛ چونكه بونچه ليك توكيلگن قان و قتللر مسووليتي دولت ضممه سيگه دير، اما حاضرگه قدر دولت اربابلري و امنيتي ارگانلر عالي مقاملري اوز مسوليت اريني بجريش ده ناكام ايكن لر. افغانستان دولتي و اوني امنيتي اداره لري مردم دن محافظت قيليش و مردم ني قان و توپراققه بويليشي آلديني آليش مسووليتي گه ايگه ديرلر.
سياسي رهبرلر و افغانستان ده سياسي و حربي قدرت ايگه لري بولگن باشليغ لر اوتكن ايگرمه ييل مدتيده تروريستي هجوملرني يالغيز قاره لش، اجتماعي ترماقلر و عالي اوقو يورتلري و شهر خيابانلري ديوارلريده شعار يازيش دن باشقه هيچ بير ايش قيلمگن لر. افغانستان دولت اربابلري بونداي تروريستي واقعه لر اصلي عامللري اوزلري ايكني ني قبول قيليش لري شرط؛ چونكه اولرني ضعف و برنامه سيزليگي سبب مملكت يشوچيلري بونداي اچنرلي وضعيت گه دچار بولگنلر. عيني حالده بيرينچي آديم ده عادي اهالي دن سانسيز قربان ليك آلگن بونداي تروريستي هجوملر مسوليتي افغانستان دولتي بوينيگه دير.
قاره لش شعار يازماق و اجتماعي ترماقلرده مناسبت كورستيش اهالي درد و قيغولريگه دوا بوله آلميدي.اهالي امنيتي ني تامين له ياتكان شخصلر بو توغريده شعار يازيش ده يوز كيلتيريش بيلن در حقيقت اهالي توله ياتكان ساليق دن اوزلريگه حشمتلي قصرار قوريشكن مملكت امنيتي مسووللري نينگ اصلي مسوليت لري يعني مردم امنيتي ني تامين لش وظيفه لريني اونوتكنلر.
بو جنايت لرني سونگي مسوليتي طالبان ضممه سيگه دير؛ چونكه بو گروه خارجي تروريست لر افغانستان ده كيليش زمينه سيني اولر مساعد ايتكن و اوارني حضوريدن افغانستان ده حمايت ايته ديلر. بو گروه تويتر آرقلي اعلاميه لرني صادر ايتيش بيلن بونداي غير انساني هجوملرگه دخلدار ايكن ليك لريني رد ايتيش بيلن اوزاريني آقلي آلميديلر.هرچند بوگروه بار بار بونداي قانلي هجوملر قاره لشكن اما خقيقت بوديركهبو گروه نينگ قولي افغانستان خدقي قانيگه بويلگن دير. چونكه بو گروه داعش، القاعده و باشقه بزنام جنگچي گروه لر حضوريني افغانستان ده مساعد ايتيب و اوز بوچاقلريني اوزر تمان آچكن دير. اگر بو شرايط ني طالبان بو گروه لرگه مساعد ايتمسه افغانستان اهالي سي بونچه ليك قتل و زوروانليك گه گواه بولمسدي.
ايندي ايسه بيرينچي دن افغانستان دولتي و ايككنيچي درجه ده
ايندي ايسه بيرينچي درجه ده افغانستان دولتي كه هر كون زونلب گناه سيز اهالي نينگ قاني توكيليش ده گواه دير و ايككينچي درجه ده طالبان گروهي كه افغانستان توپراقي بيرقسميده نظارت قيلماقده و خارجي جنگچي لر و خلق ارا تروريسم اعضالريني افغانستان ده يول بيرگن بونداي جنايت لر بجريليشي ده مسوول ديرلر.
حاضرچه افغانستان ده داعش گروهي اعضالري نينگ كتته قسمي طالبان گروهي نينگ سابق اعضالري بولگن و اكثر حاللرده طالبان قوماندان لري بيلن همكار ديرلر. شو جهت دن اوروش نينگ ايككي تماني بو مسووليت لردن اوزلريني قوتقره آلميديلر و شعار يازيش و قاره لش بيلن بونداي قانلي هجوملر مسوليتي ني باشقه بوينيگه تشلي آلميديلر. دولت اوز كوچسيزليگي و طالبان ايسه تروريستي گروه لر بيلن دايم همكارليك قيليش اوچون بونداي دهشتلي و قانلي هجوملر برابريده شبهه سيز مسوول ديرلر.