تورکيه مدافعه وزیری: انقره افغانستانگه قۉشیمچه کوچ یوبارمهیدی
تورکيه مدافعه وزیری نینگ ایتیشیچه، خارجي قۉشینلر آلیب چیقیب کېتیلگندن کېین اونینگ مملکتی افغانستانگه قۉشیمچه قۉشین یوبارمهیدی.
رویترز خبرآژانسی بوگون (۳-سرطان، پنجشنبه) تورکيه مدافعه وزیری هلوسی اکار نینگ سۉزلریگه اساسلنیب خبر بېریشیچه، تورکيه افغانستانگه قۉشیمچه قۉشین یوباریشگه تیار اېمس.
خبرده جناب اکار نینگ سۉزلریگه کۉره، تورکيه نینگ بیر قطار کوچلری حاضرده افغانستانده ناتو قوتلری ترکیبیده فعال دیر. اونینگ سۉزلریگه کۉره، بو قوتلر کابل هواقونالغی و باشقه حربي انشاعاتلرني حمایه قیلیش اوچون افغانستان ده قالیشی ممکن. تورکيه مدافعه وزیری نینگ سۉزلریگه کۉره، تورکيهدن افغانستانگه قۉشیمچه کوچلر یوباریش رېجهسی یۉق.
یقینده تورکيه جمهوررییسی رجب طیب اردۉغان امریکا پرزیدنتی جوبایدن بیلن امریکا قۉشینلری افغانستاندن چیقیب کېتگنیدن کېین تورک قۉشینلرینی سهقلب قالیش تۉغریسیده کېلیشیب آلگن اېدی. کېلیشووگه کۉره تورکيه کوچلری کابل هواقونالغی و مهم حربي انشااتلرنی حمایه قیلیش اوچون مملکتده قالیشی کوتیلماقده.