امريكاده نشر بوله ياتكان”واشنگتن پست” روزنامه سي افغانستان و امريكايي مقاملردن نقل قيليب يازگن، جاري ميلادي ييل اولي دن حاضرگه قدر امريكاحربي لري افغانستان ده گي اون قرارگالرني ترك ايتكنلر.

بو امريكاليك روزنامه بو قرارگاه لر امريكا و طالبان ارا امضالنگ كيليشو اساسيده بوشلگن. بو كيليشو اوتكن ييلي حوت آيي ده قطرده ايككي تمان ارا امضالنگندي. بو روزنامه بو راپوريده بو حربي قرارگاه لر محلي ني آچيقلشمگن.

واشنگتن پست گزارشيده بو قرارگاه لردن بير قنچه سي افغانستان امنيتي و مدافعوي قوتلريگه تاپشيريلگني و بيرقطاري هم بوتكل ياپيلگني خبر قيلينگن.

بو راپورگه كوره حاضرچه امريكا حربي لريدن فقط بيش مينگ و بيش يوز حربي قوتلر افغانستان ده قالگن. بو حربي لر ساني كيله سي ميلادي ييل اوللريده ايككي و مينگ و بيش يوز كيشي گه كميشي ريجه لنگن. امريكا مدافعه وزيرليگي ايككي هفته آلدين، امريكا جمهور رييسي دونالدترمپ نينگ امريكايي عسكرلر ساني افغانستان ده كميتيريش اوچون شاشلينچ قراريني اعلان ايتكندي.

ناتو باش كاتبي بو قرارگه قرشي ليك كورستي. ناتو باش كاتبي ينس استولتنبرگ، امريكا مدافعه وزيرليگي تمانيدن بو قرار اعلان ايتيلگن دن سونگ، كيله سي ميلادي ييل اوليگه چه امريكايي حربي ني افغانستان دن چيقاريليشي ضررلي تاثيرات قالديريشي ممكن ليگي دن آگاهلنتيردي.

المان نينگ بير قطار حربي مقاملري هم امريكاني بو قراريگه مخالف كورستيلر. المان اردوسي بير جنرالي امريكا ناتو بيلن مصلحت قيلمي اوز حربي لريني افغانستان دن چيقاره آلمي ديب تاكيدلشكندي.