يازوچي: آژفنداك

تانگ ايرته لب ايش دفتريم گه يتيب بارديم. بو زمان ده يالغيز بير ايركك همكسبيم دفترده ايدي. نيچه لحظه دن سونگ مني قوچاغلشماقچي بولدي، اما مين اوندن اوزاقلشديم. ينه بيربار مني اوزيگه تمان تارتيشدي. من ايش محلي دن چيقيب قاچديم و باشقه همكسب لريم كيلگيني وقتي گه چه دفتر ده بارمديم. ايككي اوچ كون اوني بيلن گپلشمدم اما بيركون معما نمه ديب پيام يوله دي. پيامي ده، مني يوزيم ده كوليب گپلشينگ و مهربان ليك بيلن سوزلشينگ سبب، سني بيلن جنسي رابطه قوريش ده رغبتم بار ديب يازگندي. به غايت غضبلنيب اما اونگه هيچ نرسه ايتمه ديم و دفتر نينگ عمومي ريسي گه شكايت قيلديم و بو موضوع سر قاليشي ني ريس دن التماس قيلديم. بو همكسبم اوتكن ييلي اداري تشكيلات اوزگرگني سبب ايشدن چيتلشتيريلدي.

افغانستان ده ايش محلي ده جنسي اذيت ني بونداي اچيغ روشده تجربه قيلگن شبنم كبي باشقه مينگلب قيز و عياللرهم بار و احتمال حاضر بونداي وضعيت ني تجربه قيلماقده لر و اوني عايله اعضالري بيلن شريك قيليش ده كوچ و جسارتلري يوق بولسه كيرك.

جنسي آزار و اذيت نمه دير؟

موجود تعريف لرگه كوره جنسي آزار و اذيت هرقنداي ناقولي و خوش يوق مه ياتكان سوز و عمل گه ايتيله دي كه جنسي ماهيتي بولسه و انسان كرامتي ني اياغ آستيده قالديرسه. كنايه ( پرزه ايتيش) دن باشلب هرقنداي جسمي فعاليت جنسي اذيت دن عبارت دير.

البته بو بحث ده ايسته مسليك موضوع سي هم مهم دير؛ چونكه هربير ايستلمگن و رغبت گه ضد بولگن عمل ني جنسي آزار و اذيت اتش ممكن. ايش محلي ده تورلي خيل زوروانليك لر موجود دير. فزيكي ( كلتكلنيش) زوروانليك دن توتيب روحي و جنسي اذيت بو دايره گه داخل دير. احتمال حيرتلنرلي بولسه كه عياللرگه قرشي اكثر زوروانليك و اذيت لر عموما” باشليغ لر و ايش ايگه لري تمانيدن ايمس بلكه ايشله ياتكان عياللر قولي آستيده گي شخصلر تمانيدن بجريله دي.

بو معما ني روحي تاثيراتي عموما اوزاق مدت ده اشكار بوله دي و اساسا” تشويش، قورقو، افسرده ليگ و حتي خودكش ليك گه سبب بوليشي ممكن. نيچه وقت آلدين نشربولگن ” اروپا اساسي حقلر بنيادي ” راپوريگه كوره ايش محللرده عياللرنينگ ٣٢ فايز اذيتي همكسب لر و پس درجه لي ملازملر تمانيدن عملي بولگن. بو راپورگه كوره بير قطار عياللر اوز ايشلريني قولدن بيرمسليك اوچون سكوت سقلش گه مجبور بوله ديلر. بو بنياد تيكشيرولريني كورستيشيچه بو مساله ني اينگ دهشتلي تاثيري انه شو سكوت سقلش دير. ايريم حالت لرده ايش محللر ده بو اذيت و آزار

عموما لفظي دير اما اوني عياللرگه يتكزه ياتكان روحي درد و تاثيراتي بو قتلم نينگ ايشلش انگيزه سيني كميتيره دي و حتي ايش دن قول تارتيش لري ممكن.

” ترقي تربيتي و مصلحتي موسسه” و افغانستان ده بيرلشكن ملتلر تشكيلاتي ني عياللر بويچه بوليمي همكارليگي بيلن ١٣٩٤ ييلي ده اوتكزيلگن تحقيقات نينگ كورستيشيچه اداره لرده ايشله ياتكان عياللردن ٦٥ فايزي ايش محيطي ده جنسي ازار و اذيت بولگن لريدن شكايت ايتكنديلر.

با توغريده اهميت گه سزاوار بولگن ينه بير موضوع جنسي كمستيش و ايركك لرني عياللرگه نسبتا” يوقاري جنس اوله راق ايكني موضوع سي دير. در حقيقت بو موضوع اولكه ده بير مدافعوي ميكانيزم اوله راق تن آلينگن. البته بو ناتوغري ايشانچ  بيلن عياللر اوز ايشلرني ترك ايتيش اوچون تورلي خيل باسيملر عياللرگه نسبتا”كوپيب و نهايت ده عياللر اوز ايشلريني ترك ايتيش ده محبور بوليش لري ممكن. البته بو معما ياشيرين قاليب و عياللر اوز وظيفه لريده اونچه ليك حاضر بولمي و ايش دن تيز تيز رخصت آليش بيلن نهايت ده ايشلريني ترك ايتيش گه محبور بوله ديلر.

جنسي آزار اساسا” ايككي تور دير؛ عياللر ايش ده ترفيع قيليش و بلند راق منصبلرده تعين لنيشي اوچون جنسي طلب لر بيلن يوزمه يوز بوله ديلر و يا فضا اونچه ليك افلاس لنه دي كه جنسي سوز و عمل لر اينگ اذيت لي بوليب و بو ناتينچليك عيال ني ايش دن قول تارتيشي گه سبب بوليشي ممكن.

قنداي كييم كييش، اجتماعي اورن و ظاهري گوزلليك جنسي اذيت لر ميزاني ني كوپيتيره آله دي، اما بولردن هيچ بيري بو قربانلر ايشلريني معقول لشده رول اوينه آلميدي. اكثر مملكتلرده اوتكزيلگن تيكشيرولرني كورستيشيچه اكثر دولت و نادولت اداره لرده بونداي جنسي آزار و اذيت لر موجود دير، اما خصوصي دفترلرده كوپراق دير؛ چونكه ايش مصونيتي درجه پس دير و مراجعه ايتوچي لر ساني بو دفترلرده آز بولگني گه قرگنده جنسي اذيت شرايطي مساعد راق دير.

اويت، قشاقليك، عايله مسووليتي، ايش مصونيتي بولمگني، تهديد دن قورقيش و همه دن مهمراق اذيت برابريده سكوت سقلش بونداي جنسي ازارلر اساسي عامل دير. ايش محللريده جنسي اذيت برابريده عياللر مناسبتي، انكار، سكوت، اعتراض، خاص شرايط دن يوز تارتيش و يازايش ني ترك ايتيش دن عبارت دير.