جوبایدن

جوبايدن: امريكا، افغانستان توپراقيده هر قنداي تروريستي حركت لرگه قرشي مناسبت كورسته دي

neshananews

03 May 2021

امريكا جمهور ريسي جو بايدن، القاعده ترماقي رهبري اسامه بن لادن اولديريلگني گه اون ييل تولگني مناسبتي بيلن نشر ايتكن پياميده، افغانستان ده هر قنداي تروريستي حركت لرگه قرشي، واشنگتن مناسبت كورستيش ده تيار دير ديب ايتكن.
امريكا ني ” سي ان ان ” خبري كانالي ني اعلان قيليشيچه بايدن جنابلري اوتكن كوني ( يكشنبه اون اوچينچي ثور ) توش دن سونگ واشنگتن ده ايتكن سوز لري چاغيده، القاعده ترماقي افغانستان ده ضعيف بولگني و امريكا منفعت لريگه قرشي هجوم اويشتيريش اوچون كوچ سيز بولگني ني اورغولشكن.
بايدن جنابلريني تاكيد لشيشيجه واشنگتن افغانستان ده باشلشكن اوزاق مدتلي اوروش ني يقين كونلرده توكنتيرماقچي، بايدن جنابلريگه كوره بو اورش القاعده ني امريكا گه قرشي هجومي دن سونگ افغانستان توپراقيده باشلندي و قريب ايگرمه ييل دوام ايتي.
امريكا جمهور ريسي، بو مملكت، خارجي قوتلر چيقيشي دن سونگ افغانستان وضعيتي ني توليق نظارت قيليشي و افغانستان ده هرقنداي تروريستي حركت لرگه قرشي حربي مناسبت كورستيشي ني آچيقلشكن.
بايدن جنابلري علاوه ايتكن واشنگتن، اوز وطنداشلري تينچليك و خوفسيزليگي ني تامين لش اوچون تروريستي گروه لر خصوصا القاعده ترماقي گه ضد حركت قيليش ده تيار دير ديگن.
بوندن اون ييل آلدين القاعده ترماقي رهبري اسامه بن لادن امريكاني مخصوص حربي كوچ لري عملياتي ده پاكستان پايتختي اسلام آباد شهري ١٥٠ كيلومترليگي ده جايلشكن ايبت آباد شهريده اولديريلدي.
پاكستان توپراقيده بير مهم خلق ارا تروريستي ترماق رهبري اونداي بير حالده اولديريلدي كه اون ييل اوندن آلدين، القاعده ترماقي امريكاني خلق ارا تجارت مركزيده قانلي هجوم اويشتيرگن دن سونگ امريكا افغانستان توپراقيده هجوم اويشتيريب و القاعده اتفاقداشي بولگن طالبان حكومتي تي افغانستان آغدردي.