جوزجان؛اوروش بغريده عشق و حيات
neshananews
16 February 2020جوزجان ولايتي مركزي شبرغان شهريده ايلك بار ” والنتاين” كوني اونلبچه ياشلر تمانيدن قيزيق نشانلندي.
اكثريتي اوغيل ياشلر بولگن اشتراكچي لر “عاشق لر كوني” مناسبتيده اوتكزگن احتفال ده گيتار چليب و محل ني قلب شكليده بولگن قيزيل پوفك وقيزيل گل لر بيلن بيزتيب ١٤ نچي فيبروري كوني نشانلب بيربيراولريگه عشق و مهربانليك و اولكه لريگه تينچليك و فروانليك آرزو ايتيلر.
كابل عالي اوقويورتيده گيتار چليش ني اورگنگن فريدجمال يقين ارا كونلرده شبرغان شهريده مدني و هنري دستورلرني ريجه لشتيريب عمل گه آشيرماقده. او عاشق لر كوني مناسبتي بيلن ياشلر يغينيده فعال قتنشيب اشتراكچي لرگه عاشقانه اشوله لر اوقيب قيزغين خاطره يرتدي.
جوزجان مدني فعاللريدن بيري حاجي عبدالقادر فولاد بونداي مناسبتلر نشانلنيشي حقيده ديدي:” افغانستان خلقي قرغ ييل دن بيري اوروش ني اچيغ خاطره لريني تجريه قليب كيلماقده،شوني اوچون شادليك و خرسندليك گه ضرورت لري كتته.ياشلريميز قوم و تيل دن قطع نظر هربيربهانه بيلن يغيلشيب خوشليك لريني نشانلش لري كيرك”.
والنتاين كوني ني ياشلر جوزجانده اونداي بير احوالده نشانلشديلر كه بوولايت نينگ اكثرتومن لري ناتينچ و ايككي اولسوال ليگي هم طالبان نظارتي آستيده دير.
والنتاين كوني ده قتنشكن كيشي لرگه كوره اهالي شندايين بيرم لرني ، زوروانليك ونفرت اورنيده رواجلنتريب تورت كونليك حيات لريني خرسندليك،عشق و محبت بيلن اوتكزيش لري كيرك.
نيچه كون آلدين نامزاد بولگن و تورميش اورتاقي گه كييم ساتيب آليش اوچون بازارگه كيلگن رابعه قريشي عاشق لركوني حقيده دي ي:”
من بوكون نامزادم گه ساوغه ساتيب آليش اوچون بازار كيلديم ليكن اوندن آلدين تورميش اورتاقيم بير قيزيل گل بيلن كيليب مني سوپرايز قيلدي ، اميدم شوكه برچه نامزادلر اينگ آز بير دسته قيزيل گل بيلن بو بيرم ني نشالشسه لر”.
افغانستان نينگ عنعنوي جماعه سيده خصوصا شهرلردن چكه ده جايلشكن منطقه لرده بونداي بيرم لر قيز و ايركك لر اشتراكي بيلن نشانلنيشي عادتگه ايلنمگن و ايريم جايلرده اونگه قرشي جدي و كيسكين مناسبت لر هم كورستيليب بو بيريم اوتكزيليشي گه رخصت بيريلمي دي.
فارياب و سرپل ولايت لري قوشني ليگيده جايلشكن جوزجان ده اما ايلك بار عاشق لر كوني عمومي جاي و كوپ ياشلر اشتراكي بيلن نشانلنگني دن ياشلر خرسند.
كورينيشي دن عاشق لر كوني ني نشانلگن قتلم عموما ياشلر بولگني گه قرگنده بونسل خلق ارا عرف و عنعنه لرني تن آليش ده مستحكم آدم لر كوتاريش گه موفق بولگن لر.
ايتيليشي لازم كه مزار شريف ليك ياشلر هم والنتاين يا عاشق لر كوني نشانلب بيرم اوتكزديلر.
