جوزجان ولايتي قاچقينلر اداره سي ياردم يتكزوچي موسسه لر همكارليگي بيلن شبرغان شهريده ايگرمه عايله گه ايش اسباب اسكونه لرني ترقتدي.

بو اسكونه لر تيكيش ماشيني، نجارليك و تيميرچيليك اسباب لريدن عبارت بولگن.بو ياردم لرني قولگه كيريتكن عايله لر بوندن سونگ حياتلري اقتصادي جهت دن يخشي راق اوتيشي ني اميد قيلماقده لر.

جوزجان ولايتي قاچقينلر اداره سي ريس عبدالمالك رستمي بوكون شنبه١٦ حمل نشانه خبر آژانسي بيلن صحبتده ديدي بو ايگرمه عايله اعضالري بوندن آلدين آلتي آي ليك بير تعليمي دوره ني اوتكزديلر.رستمي جنابلري آلمان نينگ “GTZ” و “Union Aid”موسسه لري بو عايله لرگه نجارليك، تيميرچيليك و خياطليك فن لريني اورگتگني ني ايتيب حاضر بولردن هر بيريگه ايگرمه مينگ افغاني گه تينگ تورلي خيل كيركلي اسباب اسكونه لر بيريلدي ديدي.

رستمي جنابلري ديدي:”تعليم كورگن بو شخصلرگه ايش اسبابلري ترقتيلگن دن علاوه هركيشي گه ايشلري باشلنگني دن سونگ هر آي ده تورت مينگ افغاني آي ليك هم بيريله دي”. اونگه كوره قاچقينلر اداره سي بو شخصلر ايشلب چيقارگن اشيالرگه جوزجان و قوشني ولايتلرده مناسب بازار تاپيش ده هم سعي قيلماقده.

 عيني دمده بو اسباب اسكونه لرني قولگه كيريتكن عايله لر ، تعليم و ايش زمينه سي بو موسسه لر تمانيدن اولرگه مساعد ايتيلگني ني آلقيشله گن لر.

آلتي آي تعليم كوريب و بوكون اسباب اسكونه قولگه كيريتكن محمد شريف جوزجان ولايتي درزاب اولسوال ليگي دن آواره بولگن، او ديدي:” اوروش سبب بيز درزاب تومني دن چيقيب قاچيش گه مجبور بوليب شبرغان شهريده باش پناه آلديك،شبرغان ده آلتي آي نجارليك بويچه تعليم كورديب ايندي دوكان آچيب ايش باشلش گه قادر بولديك”. او نجارليك دوكان آچيش بيلن عايله سي روزغاريني بيملال اوتكزيش و عايله سي اقتصادي گه مثبي اوزگريش يوزگه كيليشي گه اميدي كتته دير.

عبدالخبير هم تيميرچيليك بويچه تعليم كورگن لردن بيري دير. او:” مين تيميرچيليك دوكان آچديم و هر كوني ٣٠٠ دن ٥٠٠ افغاني گه چه عايداتم بار” ديب ايتي.بو آواره اوتكزگن تعليمي دوره اوته فايده لي ايكني ني تاكيدلب “بو دستور برچه آواره لر و اوروش دن ضرر زيان كورگن لر اوچون يولگه قويليشي ني آرزو قيله من”ديدي.

جوزجان ولايتيدقاچقينلر اداره سي انده سنده اوروش دن تاثيرلنگن عايله لرگه ياردم كورستيب كيلماقده. نيچه وقت آلدين بو اداره “GTZ” و “Union Aid” موسسه لري همكارليگي بيلن ٤٠ عايله گه يونگ ييگيريش اسباب اسكونه لريني ياردم بيرگندي.بو ياردم لر عموما عيال آواره لرگه اجرتيلگندي.

مملكت شماليده جايلشكن شبرغان شهري اوروش آواره لري اوچون بير آز تينچ منطقه دير، قوشني ولايت لردن كوپلب اواره لر حاضر بو شهرده كون كيچيريب كيلماقده لر.قاچقينلر اداره سي نشر ايتكن رقملرگه كوره حاضرچه اون مينگ دن كوپراق آواره لر شبرغان شهريده كون كيچيرماقده لر. بو آواره لردن اكثريتي چادرلر آستيده حيات اوتكزماقده لر.